Sibir jarasynyń órshýine baılanysty Aqmola oblysynyń bas veterınary jazalandy

ASTANA. KAZINFORM — Aqmola oblysynyń ákimi Marat Ahmetjanov qaıǵyly oqıǵaǵa qatysty qyzmettik tekseris nátıjesinde oqıǵaǵa qatysy bar qalǵan tulǵalar da jazalanatyny týraly habarlady.

Ákimniń sózinshe, juqpaly oshaqtardyń taralýyn boldyrmaý maqsatynda sibir jarasynyń órshýinen keıin naýqastarmen baılanysta bolǵan barlyq adam tekserilgen. Olardyń arasynda ınfektsııa anyqtalǵan joq.

— Barlyǵy 8 adamnan dıagnoz rastaldy, onyń 7-si aýrýhanadan shyǵaryldy. Taǵy bir naýqas emdelip jatyr, jaǵdaıy jaqsy, biraq biz ony tolyq emdelgenshe baqylaýda ustaımyz. Oshaq anyqtalyp, joıyldy, eshqandaı saldary joq. Búgin bizge zertteýshiler toby keledi. Olardy ózimiz shaqyrdyq, qarjylandyrýdy da ózimiz uıymdastyrdyq. Kúdik bar jerlerdiń bárin tekseremiz. Sol aýmaqta sibir jarasynyń eski kómilgen orny bolǵan. Sý tasqyndary jaǵdaıdy qıyndatty: 40-jyldardan qalǵan jerleý oryndary búlinip, kemirgishter arqyly ınfektsııa tarady. Qazir sol jerlerdiń bárin oqshaýlap, betonmen quıyp jatyrmyz. Barlyq shara ǵylymı negizdelgen. Qazirgi ýaqytta halyq úshin eshqandaı qaýip joq, — dedi óńir basshysy.

Sonymen qatar, ol tıisti baqylaýdy qamtamasyz etpegen basshylar da jazalanǵanyn habarlady.

— Búgin men veterınarııa basqarmasynyń basshysyna qyzmettik tártipke tolyq sáıkes kelmeıtindigi týraly eskertý jarııaladym. Qyzmettik tekseris nátıjesinde oqıǵaǵa qatysty qalǵan adamdar da jazalanady, — dep túıindedi Marat Ahmetjanov.

Buǵan deıin habarlanǵandaı, Aqmola oblysynda sibir jarasynyń terige shyǵatyn túri tirkeldi.

Sonymen qatar Aqmola oblysy Atbasar aýdanyna qarasty eki eldi mekennen Sibir jarasy anyqtalyp, aýyldar karantınge jabyldy.