Sibir jarasy: Almatydaǵy bazarda 4 myń kelige jýyq qaýipti et joıyldy
QONAEV. KAZINFORM - Qazaqstanda jyl basynan beri sibir jarasyn juqtyrýdyń 17 jaǵdaıy belgili bolsa, onyń 14 jaǵdaıy Almaty oblysynyń Uıǵyr aýdanynda tirkelgen. Osy oraıda, Kazinform tilshisi Almaty oblysynyń Densaýlyq saqtaý basqarmasyna saýal joldap, aýdandaǵy qaýipti aýrýǵa qarsy qandaı jumys atqarylyp jatqanyn anyqtady.
Bıyl 3 qyrkúıek kúni Almaty oblysy Uıǵyr aýdanyna qarasty Úlken Aqsý aýyldyq okrýginde 4 adam sibir jarasyn juqtyrǵany habarlandy. 5 qyrkúıek kúni Úlken Aqsý aýylynda karantın engizildi. 27 qyrkúıek kúni jaǵdaıdyń turaqtanýyna baılanysty karantın alynyp tastaldy.
Almaty oblysynyń Densaýlyq saqtaý basqarmasyna qarasty Uıǵyr aýdandyq ortalyq aýrýhana málimetine sáıkes, aýdanda 9 aıda sibir jarasynyń jalpy 14 jaǵdaıy tirkelgen. Onyń ishinde 11 jaǵdaıda aýrý zerthanalyq jaǵdaıda rastalsa, 3 jaǵdaı klınıkalyq, epıdemıologııalyq kórsetkishterimen naqtylandy. Aýrý oshaqtarynda qarym-qatynasta bolǵan 41 adam medıtsınalyq baqylaýǵa alyndy.
«Barlyq jaǵdaıdyń naqtylanǵan dıagnozy - sibir jarasy, terilik túri. Aýrý oshaqtaryna veterınarlyq qyzmetpen birge epıdemıologııaly-epızootologııalyq tekserýler júrgizildi. Barlyq jaǵdaıda naýqastar maldarmen turmystyq janasý kezinde aýrý juqtyrǵan», - dedi Uıǵyr aýdandyq ortalyq aýrýhananyń dırektory Álııa Aqjoltaeva.
Sondaı-aq, mekeme basshysy sibir jarasyn juqtyrǵan naýqastardyń bireýi ǵana búgingi kúni emin jalǵastyryp jatqanyn, qalǵan naýqastar aýrýhanalyq jaǵdaıda emdelgenin atap ótti. Jalpy sibir jarasyna qarsy aýdanda 170 doza ekpe alynyp, ony búginge deıin 158 adam alǵan.
Karantın kezinde úı-úıdi aralap, naýqastardy anyqtaý maqsatynda Úlken Aqsý aýylynda 273 aýla tekserilgen. Oǵan qosa, aýrý oshaqtarynan, syrtqy qorshaǵan ortadan zertteýlerge 498 synamalar alyndy. Epıdemıologııalyq tekserý men zertteýler nátıjesinde 30 synama oń nátıje bergen. Sibir jarasynyń belgileri mal etinen, terisinen, qıynan, mal soıylǵan jerdiń topyraǵynan, jaıylym topyraǵynan tabylǵan.
«Aýrý oshaqtaryn epıdemıologııalyq tekserý kezinde naýqas soıyp alǵan aýrý maldyń etin deldarlar Almaty qalasyna alyp ketkendigi anyqtalyp, aýdandyq polıtsııa bólimi habardar etildi. Іzdestirý barysynda et Almaty qalasynyń «Elaman» bazaryna alynyp barǵandyǵy anyqtalyp, atalǵan bazardan 3800 kg et kúıdirý arqyly joıyldy», - dedi Álııa Aqjoltaeva.
Jalpy Úlken Aqsý aýyldyq okrýginde barlyǵy 7510 bas iri qara, 18615 bas usaq mal, 1240 bas jylqy sibir jarasyna qarsy vaktsınatsııalanǵan. Mal qoralary men jaıylym jerlerge 33 998 sharshy metr aýmaqqa (onyń ishinde, 13 000 sharshy metr jaıylym jer) 3%-dyq glıýzamın vet eritindisimen dezınfektsııa júrgizilgen. Sonymen qatar, aýdanda sibir jarasynyń topyraqtyq oshaǵy anyqtalǵan eldi mekender esepke alynǵan, olar: Sharyn, Shonjy, Aqtam aýyldary.
Eske salaıyq, buǵan deıin Qazaqstanda sibir jarasyna shaldyǵý deńgeıi 2024 jyldyń sońǵy 10 aıynda 2023 jyldyń sáıkes kezeńimen salystyrǵanda eki ese tómendegenin jazǵanbyz.