«Sberbank» ıpoteka boıynsha mólsherlemeni 15 paıyzǵa deıin kóterýi múmkin
ASTANA. QazAqparat - Reseıdiń Ortalyq bankiniń basty mólsherlemesiniń kúrt kóterilýinen keıin «Sberbank» taıaý arada ıpoteka boıynsha ortasha mólsherlemeni búgingi 13 paıyzdan 15 paıyzǵa deıin kóterýi múmkin, dep málim etti Reseıdegi iri banktiń basqarma tóraǵasynyń orynbasary Bella Zlatkıs, dep habarlady Bı-bı-sı.
Sonymen birge ol bank basshylyǵynyń ıpotekalyq nesıelerdi shyǵynǵa berý sheshimin qabyldaǵanyn aıtty.
«Ortalyq bank mólsherlemesi 17 paıyz jáne biz ıpotekany shyǵynmen nesıeleıtin bolamyz. Bizdiń kirisimiz bizge osyndaı múmkindik berip otyr», - dedi Zlatkıs.
Ótken dúısenbide bir kúni ishinde rýbl dollar men eýroǵa qatysty 10 paıyzdan astam quldyrap ketkende, OB dırektorlar keńesiniń keshki otyrysynda 90-shy jyldardyń sońynan bastap paıyzdyq mólsherlemeni 17 paıyzǵa deıin kóterý týraly sheshim qabyldandy.
Zlatkıs sonymen birge «Sberbanktiń» ıpotekalyq nesıelerdi sheteldik valıýtamen bermeı kele jatqanyna birneshe jyl bolǵanyn jetkizdi. Burynyraqta áldeqaıda tómen mólsherlemelermen kóptegen reseılikter nesıeni dollar jáne eýromen alyp, jyljymaıtyn múlikke ıe bolǵan.
«Dollarmen ıpoteka berý - bul asa qıyn másele. Bizde dollarmen beriletin ıpoteka joq. Biz adamnyń ózniń qarjylyq múmkindikteriniń qandaı jaǵdaıda ekenin ózi de únemi túsine bermeıtinin burynnan bilemiz. Sondyqtan biz burynnan ıpotekany dollarmen emes, tek rýblmen beremiz», - dedi Zlatkıs.
