Sberbank basshysy taıaý 10 jyldaǵy munaı baǵalarynyń «shynaıy» dıapazonyn atady
ASTANA. QazAqparat - On jyldyń ishinde munaı baǵasy bir barrel úshin 50-55 dollar deńgeıinde turaqtaı alady. Bul týraly Reseı Energetıka mınıstrliginiń janyndaǵy qoǵamdyq keńestiń aıasynda Sberbank prezıdenti German Gref málimdedi, dep habarlaıdy RBK.
«Eger munaı baǵasy on jyl boıy 40-50 dollar deńgeıinde tura alsa she? 40 dollar bolatynyna senbeımin, biraq 50-55 dollar bolýy ábden múmkin. Osyndaı stsenarıı oryn ala alady», - dedi Gref.
Sonymen birge ol RF Energetıka mınıstrligin strategııalyq kórsetkishterdi josparlaýda munaı baǵasy boıynsha optımıstigi budan da az boljamdardy esepke alýdy shaqyrdy. Ol munaı barreliniń 47 dollar baǵasy kezinde bıliktiń onyń 70-80 dollar turatyny týraly aıtýyn «problema» dep atady.
