Saıttar reıtıng qýyp ketti - Óńirlik BAQ forýmy
ASTANA. QazAqparat - «Bolashaq jastar» gazetiniń bas redaktory Dáýren Babamuratovtyń aıtýynsha, búginde buqaralyq aqparat quraldarynyń barlyǵy reıtıngke, oqyrmandardyń sanyna kóp kóńil bóledi.
Sol sebepti materıaldardyń sapasy da tómen. Al jýrnalıster xalyqty "tańǵaldyratyn" jańalyqtardy terip ketti, dep xabarlaıdy QazAqparat tilshisi.
"Búginde barlyq buqaralyq aqparat quraldarynyń negizgi maqsaty ózgerip ketken tárizdi. Buǵan deıin bári aqparat taratýdy kózdese, qazir eldi tańǵaldyrýǵa tyrysady. Osy jolda kez kelgen nársege barady, adamnyń jeke ómirine aralasady, ataq-abyroıyna nuqsan keltiredi. Al onyń arǵy jaǵynda ulttyń tutastyǵy, rýlyq alaýyzdyq jáne taǵy máseleler jatyr. Ásirese, saıttar eldi "tań qaldyrý" úshin baryn salyp jatady. Sebebi talap sondaı. Mınıstrlik árbir saıttyń taralymyna, oqyrmannyń sanyna nazar aýdarady. Al ol taralym qalaı keldi? Azannan keshke deıin eldi bir-birine aıdap salý, rýshyldyqty qozdyrý, moraldyq qundylyqtardy taptaý arqyly jınalǵan reıtıng bolsa da, oǵan eshkim nazar aýdaryp jatqan joq", - dedi Babamuratov búgin Óńirlik BAQ forýmynda.
Onyń aıtýynsha, qazirgi júıe qala berse, elektrondy buqaralyq aqparat quraldary osy baǵytta damı beredi. Barlyǵy birdeı saraptamany ysyryp qoıyp, eldi "tańǵaldyrýmen" aınalysa beredi, reıtıng úshin jumys isteıdi. "Shartty túrde Qyzylordada, Jezqazǵanda, Shymkentte bireýdiń qoly qyzǵa tıip ketse, ol aqparat 10 buqaralyq aqparat quralyna aýysqanda qyz zorlandy bolyp shyǵady. 20-syna aýysqanda "zorlanyp óldi" bolady. Biraq ol aqparat shynaıy ma? Ókinishke qaraı, osy máselege kóp mán bermeıtin boldyq", - dep atap kórsetti gazet basshysy.
Aıta keteıik , búgin Astanadaǵy "Qazmedıa" ortalyǵynda Óńirlik BAQ forýmy ashyldy. Sol jerde mınıstr Dáýren Abaev Óńirlik BAQ alıansynyń nemen aınalysatynyn aıtyp berdi . Al QR Parlament Májilisiniń depýtaty Saýytbek Abdraxmanov qazaq tilindegi saıttarda traıbalızmniń kúsheıip jatqanyna óz alańdaýshylyǵyn bildirdi .
