Saıt arqyly múlkin satpaq bolǵan elorda turǵyndary alaıaqtyń qurbany bolýda

NUR-SULTAN. QazAqparat – Habarlandyrý saıttarynda múlkin satqan elorda turǵyndary alaıaqtardyń qurbany bolýda. Bul týraly qalalyq polıtsııa departamenti Krımınaldyq polıtsııa basqarmasynyń kıber qylmyspen kúres bóliminiń aǵa jedel ýákili Saıat Dúısenbaev aıtty, dep habarlaıdy QazAqparat tilshisi.

Elorda turǵyndary qalalyq Polıtsııa departamentine ınternet alaıaqtyń qurbany bolǵany týraly aryz-shaǵym túsirip jatyr.

«Tolyǵyraq toqtalyp ótsem: Onlaın habarlandyrý saıtynda (OLX) menshik zatyn satpaq bolǵandar jarnama beredi. Qazaqstanda nemese elordada júrgen ınternet alaıaqtyqpen aınalysatyndar habarlandyrýdy zerdelep, jeke múlkin satatyn adamdarǵa WhatsApp arqyly habarlasyp, onyń múlkin satyp alamyn dep ótirik kelisedi. Jábirlenýshiler múlkin satyp alamyn degen alaıaqqa múliktiń sýretin jiberip, baǵasyn aıtyp, ortaq kelisimge keledi. Osy oraıda alaıaq jábirlenýshige aqsha aýdaramyn degen jeleýmen bank kartasynyń nómirin, JSN nómirin, CVV kodyn suraıdy», - deıdi Saıat Dúısenbaev.

Onyń aıtýynsha, jábirlenýshiler ınternet-alaıaqtarǵa aldanyp, olar suraǵan málimetterdi beredi.

«Alaıaqtar jábirlenýshiniń bank shotyna múliktiń bastapqy somasyn salady. Mysaly, 1-1,5 mıllıon teńge artyq salady da, «Sizge artyq aqsha salyp jiberippin. Bank kartasynyń qupııa kodyn bere alasyz ba? Artyq ketken aqshany qaıtaryp qalaıyq» dep aldaý arqyly jábirlenýshiniń bank kartasynyń nómirin, JSN nómirin, CVV kodyn biledi. Odan keıin jábirlenýshiniń kartasyndaǵy qarjyny túgel sheship alady», - deıdi ol.

Osyndaı jaǵdaıǵa tap bolǵan 50 adam polıtsııaǵa shaǵymdanǵan.

«Internet-alaıaqtarǵa aldanǵandardyń kóbi – zeınetker. Turǵyndardy osyndaı jolmen aldanyp qalmaýǵa shaqyramyz. Bank kartasynyń nómirin, JSN, CVV kodyn eshkimge berýge bolmaıdy. Qazirgi ýaqytta Krımınaldyq polıtsııa qyzmetkerleri jáne tergeý basqarmasynyń tergeýshileri osy fakti boıynsha 5 qylmysty ashty. Onyń ishinde 3 adam ustalyp, tergeý amaldary júrgizilip jatyr», - deıdi Saıat Dúısenbaev.