Saıranǵa batyp ketken jasóspirimniń denesi sýdan shyǵaryldy
ALMATY. KAZINFORM – Respýblıkalyq jedel-qutqarý jasaǵynyń súńgýirleri jasóspirimniń denesin sýdan alyp shyqty.
Almaty qalalyq Tótenshe jaǵdaılar departamentiniń málimetinshe, Saıran kóliniń batys jaǵalaýynda 2007 jyly týǵan jasóspirimniń sýǵa batyp ketkeni týraly aqparat 109 qutqarý qyzmetiniń pýltine túsken.
Aıta keteıik, dál osy aýmaqta «Shomylýǵa tyıym salynǵan» degen eskertý belgisi ornatylǵan.
— Oqıǵa ornyna dereý Almaty qalalyq qutqarý qyzmetiniń, TJD, respýblıkalyq jedel-qutqarý jasaǵynyń mamandary, polıtsııa qyzmetkerleri men jedel járdem brıgadasy keldi. Іzdestirý-qutqarý jumystary barysynda RJQJ súńgýirleri jasóspirimniń máıitin sýdan alyp shyqty. Qazir oqıǵanyń mán-jaıy anyqtalyp jatyr, — dep habarlady TJD baspasóz qyzmeti.
Vedomstvo ókilderi Saıran kólinde shomylýǵa qatań tyıym salynǵanyn eske saldy. Onyń aýmaǵynda abattandyrý jumystary jalǵasyp jatyr.
Qutqarýshylar Almaty qalasynyń turǵyndary men qonaqtaryn sý aıdyndarynda qaýipsizdik erejelerin qatań saqtaýǵa, eskertý belgilerine nazar aýdarýǵa jáne ómir men densaýlyqty qorǵaýǵa shaqyrdy.
Osyǵan deıin Saıran kóline jasóspirimniń batyp ketkeni týraly jazǵanbyz.