Saıranda ıtti ajaldan arashalaǵandar 10 jyldan keıin qaıta kezdespek
ALMATY. KAZINFORM – Saıran kólinde sýǵa qulaǵan ıtti qutqaryp qalǵan almatylyqtar araǵa 10 jyl salyp qaıta kezdesedi. Kezinde kezdeısoq birigip, janýardy ajaldan arashalaǵan jandar bul joly «Birlik» art-nysanynyń janynda bas qospaq.
Bul músin Úlken Almaty ózeninde bolǵan naqty oqıǵa negizinde jasalǵan. Sol kúni kópir ústinde turǵan adamdar bir sátte oılanbastan áreketke kóship, qol ustasyp tizbek quryp, janýardy ajaldan arashalap qalǵan edi.
Eskertkishtiń erekshe tusy – onyń «tiri» sımvolıkasynda. Sońǵy músinniń sozylǵan qoly qorshaýdan asyp turady. Kez kelgen adam oǵan óz qolyn qoıyp, sol birlik tizbeginiń jalǵasyna aınala alady.
«Oılanyp úlgermedik… jaı ǵana kómektestik»
Itti qutqaryp qalǵandardyń biri – almatylyq Birjan Seıdahmet. Ol sol kúndi bylaı eske alady:
– Sol kúni Saıran kóliniń jaǵasynda qydyryp júrgenbiz. Kópir ústinde turǵanda ıttiń joǵarydan qulap ketkenin kórdik. Bir jigit sýǵa túsip, alyp shyqpaq boldy. Basqalary qol ustasyp, tizbek qurdy. Alaıda jetpeı jatty. Sosyn biz de kómektesýge bardyq. Meni «uzynsyń» dep tómen túsirdi. Tómendegi jigittiń qolynan ustap, joǵaryǵa tartyp shyǵardyq. Joǵaryda turǵan áıelder ıtti alyp ketti. Sosyn bárimiz óz jónimizben kettik, - deıdi ol.
Ol bul sátte eshkim batyldyq týraly oılamaǵanyn aıtady. Barlyǵy ishki túısikpen áreket etken.
– Ondaı kezde oılanýǵa ýaqyt bolmaıdy. Sol mańnan ótip bara jatqan kez kelgen adam kómekteser edi dep oılaımyn, - deıdi Birjan.
Jyldar ótken soń sol sáttiń eskertkishke aınalǵanyn estigende, Birjan jaı ǵana jymıyp eske alǵan.
– Vıdeony keıin kórdik. Áleýmettik jelide tarap ketipti. Músin qoıylatynyn aǵamnan estidim. Erekshe sezim boldy. Bizdiń qoǵamda bireý qıyndyqqa tap bolsa, eshkim qarap turmaıdy. Kómek kórsetý – bizdiń bolmysymyzda bar. Adamǵa da, janýarǵa da jaqsylyq jasasań, onyń saýaby bar. Bir-birimizge meıirimdi bolaıyq, - deıdi ol.
Birjan Seıdahmettiń aıtýynsha, bul oqıǵadan keıin ózimen birge ıtti qutqaryp qalǵandardy izdep te, kezdestirip te kórmegen.
– Óıtkeni olardyń eshbirin tanymaımyn. Jýyrda osy músindi qoıýǵa atsalysqan kisiler basqa adamdardy izdestirip jatyrmyz, kezdesý uıymdastyramyz dedi. 10 jyldan soń qaıta qaýyshpaqshymyz, - deıdi Almaty turǵyny.
Álem jurtyn tańǵaldyrǵan oqıǵa
Qola skertkish resmı ashylmaı turyp-aq, álemdik medıa keńistiktiń nazaryn aýdarǵan erekshe qubylysqa aınaldy. Saltanatty rásimge eki kún qalǵanda sońǵy ornatý jumystarynyń fotolary áleýmettik jelilerde jarııalanyp, jańalyq sanaýly sátte-aq keńinen tarady. Osylaısha, Almatydaǵy bul oqıǵa shekara asyp, Ispanııa, Vetnam, Brazılııa, Úndistan sııaqty alys elderge deıin jetti.
Aldyńǵy apta ishinde álemniń 30-dan astam elinde bul art-nysan týraly júzden asa materıal jaryq kórdi. Olardyń qatarynda CBS, BBC Arabic, Times of India, Yonhap, Sin Chew Daily, La Repubblica, Inquirer.net, La Jornada sııaqty bedeldi halyqaralyq basylymdar bar. «Birlik» art-nysany jaıly kontenttiń jalpy qaralymy 500 mıllıonnan asyp, ol adamgershilik pen janashyrlyqtyń jahandyq sımvolyna aınaldy.
Bul áser áleýmettik jelilerde de anyq baıqaldy. Instagram-daǵy 42 mıllıonnan astam oqyrmany bar @Pubity paraqshasy eskertkishtiń fotosyn jarııalady. Al @jackie.sffgff bólisken vıdeo 19 mıllıonnan astam qaralym jınady. Reddit platformasynda pikir bildirgender bul músindi «izgilik pen adamdyqty qadirleıtin qoǵamnyń kórinisi» dep baǵalap jatyr.
Áleýmettik jelilerdegi qyzyǵýshylyq áli de báseńdegen joq – tanymal platformalarda kún saıyn jańa jazbalar men vıdeolar jarııalanyp, «Birlik» oqıǵasy adamdardy meıirim men ózara qoldaýdyń mańyzyn qaıta eske salyp jatyr.
Eske salaıyq, buǵan deıin Almatyda 160 tarıh jáne mádenıet eskertkishi baryn jazǵanbyz.
