Saıran jaǵalaýyn abattandyrý: Almaty ákimi merdigerge eskertý jasady

ALMATY. KAZINFORM – Almaty ákimi Darhan Satybaldy apparat keńesi barysynda Saıran kóliniń sanıtarlyq jaǵdaıyna erekshe nazar aýdardy.

Almaty ákimdiginen málim etkendeı, megapolıs basshysy tártip buzýshylarǵa der kezinde shara qoldanbaǵan jáne baqylaý júrgizbegen Ekologııa, qoǵamdyq keńistikti damytý basqarmasy men Polıtsııa departamentiniń jumysyn synǵa aldy. Sondaı-aq merdigerge barlyq anyqtalǵan kemshilikti joıý týraly sońǵy eskertý jasady.

Keńes barysynda qańtar-mamyr aılarynda bıýdjetti júzege asyrý jáne áleýmettik-ekonomıkalyq damý qorytyndylary, sondaı-aq «Taza Qazaqstan» baǵdarlamasynyń oryndalý barysy pysyqtaldy. Aýdan ákimderine qalanyń problemalyq ýchaskelerin qoqystan tazartyp, bitelgen aryqtardy retke keltirý tapsyryldy. Jumys erekshe baqylaýda bolady.

Sondaı-aq, qala basshysy Almatynyń kúzgi kógaldandyrý josparyn usynýdy jáne aýany lastaıtyn kólikke baqylaýdy kúsheıtýdi tapsyrdy.

Osyǵan deıin Saıran kólinde abattandyrý jumystary aıaqtalmaı jatyp, tazalyq máselesi týyndaǵany týraly jazǵanbyz. 

Aıta keteıik, Saıran kóliniń jaǵalaýyna skeıtpark salynady.