«Saıran» ózeniniń aınalasyn abattandyrý keler jyly da jalǵasady - Baýyrjan Baıbek
ALMATY.QazAqparat - Almaty ákimi Baýyrjan Baıbek «Saıran» ózeniniń aınalasyn aralap, keler jyly da abattandyrý jumystaryn toqtatpaýdy tapsyrdy. Bul týraly qala ákimdigi baspasóz qyzmeti málimdedi, dep habarlaıdy QazAqparat tilshisi.
«Bıyl sý qoımasynyń batys bóliginiń betkeıleri rettelip, satyly túsý joly jóndelip, 7 ga jerge gúlzar tóseldi. Sonymen qatar jaryq kózderi ornatylyp, asfalt jóndelip, balalar jáne sport alańdary kórkeıtildi. Shyǵys bólikte kóshe jıhazy qoıylyp, jańadan 130 jaryq baǵanalary ornatyldy. Vorkaýt-alań men jaǵalaý voleıbolynyń alańy jasaldy. Júgirý men velosıped tebýge arnalǵan 5 shaqyrym jol salyndy», - dedi ákimdiktiń baspasóz qyzmeti.
Megapolıs ákimi keler jyly da ózen mańyn abattandyrý jumystaryn jalǵastyryp, aýdan ákimdikterine ózenge jaqyn aýmaqtardy kóriktendirý, sport jáne balalar alańdarynyń sanyn kóbeıtýdi tapsyrǵan.
Aıta ketý kerek, Almatyda bıyl 524 kóshe jóndelip, 1400 eski aýla jańarǵan. 300 shaqyrym aryq salynyp, 800 shaqyrym ınjenerlik jeli tartyldy.
Qalanyń barlyq jer asty ótpeli joly jańardy. Jyl aıaǵyna deıin kóshe jaryqtarynyń úshten biri jaryq dıodty jáne energııa jınaqtaýshy shamdarǵa aýystyrylmaq.
