Saıran kóliniń jaǵalaýyna skeıtpark salynady
ALMATY. KAZINFORM – Qala ákimi Darhan Satybaldy Saıran sý qoımasy aımaǵyn kórkeıtý jumystarynyń barysymen tanysty.
Almaty ákimdiginen málim etkendeı, joba aıasynda uzyndyǵy 2,5 shaqyrym bolatyn serýen jolyn, jaǵajaı aımaǵyn, balalar men sport alańdaryn, velosıped jáne skeıtparkterdi salý kózdelgen. Sonymen qatar sanıtarlyq aımaqtar, polıtsııa men qutqarý beketteri de qarastyrylǵan.
Qala basshysyna óziniń tapsyrmasymen júrgizilgen qala keńistigin qoljetimdi etýge baǵyttalǵan jumystar týraly baıandaldy. Atap aıtqanda, Tóle bı kóshesi boıynda jaǵalaýdan trotýarǵa shyǵatyn ótkel jasalǵan, al Abaı kóshesi jaǵynan pandýs ornatylǵan. Jubanov kóshesiniń eń tik bóliginde múmkindigi shekteýli azamattarǵa arnalǵan jedel saty salý josparlanyp otyr. Buǵan qosa, Varlamov kóshesi jaǵynan jasyl jelekke zııan keltirmeı, balalar arbasyna arnalǵan asfalt jol tóselip jatyr.
– Eger biz jańa bir jobany iske asyryp jatsaq, ony birden 10-20 jylǵa laıyqtap jasaýymyz kerek. Áıtpese, biraz ýaqyttan keıin qaıtadan jóndeýge týra keledi. Bul jerde qala turǵyndary men qonaqtary úshin ózine tán erekshe atmosfera qalyptasýy shart. Eger Saırandy jańǵyrtyp, kórkeıtýge kirissek, ol zamanaýı talaptarǵa saı bolýy kerek, - dedi qala ákimi.
Jumys barysynda qosymsha ınjenerlik jáne landshaftyq sheshimder qabyldaý qajettigi týyndaǵan. Bul jobanyń sapasyn arttyrady, biraq qurylys merzimin sál uzartady.
Osyǵan deıin Saıran kóliniń jaǵalaýyn abattandyrý jumystary 90 paıyzǵa oryndalǵany týraly jazǵanbyz.
Eske salaıyq, osyǵan deıin Almatynyń burynǵy ákimi Erbolat Dosaev Saıran kóliniń jaǵalaýyn abattandyrý jumystary mamyrda aıaqtalatynyn aıtqan.