Saıran kóliniń jaǵalaýyn abattandyrý jumystary mamyrda aıaqtalady

ALMATY. KAZINFORM – 2025 jyly Almatyda tórt jańa qoǵamdyq keńistiktiń qurylysy aıaqtalady. Bul týraly Almaty ákimi Erbolat Dosaev Áýezov aýdanynyń turǵyndarymen kezdesý barysynda málimdedi.

– 2025 jyldyń maýsym aıynda 4 qoǵamdyq keńistikti kórkeıtý jumystaryn aıaqtaýdy josparlap otyrmyz. Atap aıtar bolsam, Aqsaı-4 jáne №12- shi shaǵyn aýdandaryndaǵy skverler, Mamyr - 4 jáne Jetisý-3 shaǵyn aýdandaryndaǵy jaıaý júrginshiler aımaqtary. Bul jobalar aıasynda jańa balalar jáne sport alańdary, kóshe jıhazdary, demalysqa arnalǵan kúrkeler ornatylyp, jaryqtandyrý jańartylady jáne jasyl jelekter egiledi, – dedi Almaty ákimi.

Negizgi jobalarynyń biri – Saıran kóliniń jaǵalaýyn jańartý jumystary.

– 2024 jyldyń sońynda negizgi qurylys jumystary bitti, al bıyl mamyr aıynda jobanyń sońǵy kezeńi aıaqtalady. Saıran kóli qala turǵyndary men qonaqtary úshin eń tartymdy demalys oryndarynyń birine aınalady dep senemin, – dedi Erbolat Dosaev.

Buǵan deıin qala ákimdigi jobanyń eskızderin usynǵan bolatyn. 

Eske salsaq, Almaty ákiminiń tapsyrmasy boıynsha 2022 jyly sońǵy 50 jyl ishinde alǵash ret Saıran sý qoımasynyń túbi qoqys pen laı shógindilerden mehanıkalyq túrde tazartyldy.

Aýmaqtyń jalpy aýdany 46,79 gektar.

Saıran kóliniń jaǵalaýyn abattandyrýǵa 4 mlrd teńge bólindi.