Saıran kóliniń jaǵalaýyn abattandyrý jumystary qashan aıaqtalady
ALMATY. KAZINFORM – Saıran kóli Almaty turǵyndary men qonaqtary úshin tartymdy jáne qaýipsiz orynǵa aınalady.
Megapolıs ákimi Erbolat Dosaevtyń tapsyrmasy boıynsha munda negizgi sý aıdynynyń kelbeti men fýnktsıonaldyǵyn ózgertý boıynsha aýqymdy joba qolǵa alyndy. Qala basshysy sý qoımasynyń irgeles aýmaǵyn rekonstrýktsııalaý jáne abattandyrý jumystarynyń barysymen jeke ózi tanysty.
Erbolat Dosaev barlyq jumystar aıaqtalǵannan keıin Saıran kóli Almatynyń polıortalyqtarynyń birine aınalatynyn, onda qala turǵyndary maýsymǵa qaramastan balalarmen birge ýaqyt ótkize alatynyn atap ótti.
Almaty ákimine jobany landshaft sáýletshisi Nellı Lapteva tanystyrdy.
Onyń aıtýynsha, qazir osy ýchaskede qolda bar konstrýktsııalar men shaǵyn sáýlet pishinderin bólshekteý aıaqtaldy. Jobaǵa sáıkes batys jáne shyǵys kireberis toptarynyń arkalaryn jóndeý qarastyrylǵan, onda qorshaýlary bar jaıaý júrginshilerge arnalǵan tas joldar salynady. Soltústik jáne ońtústik jaǵalaýlarda tireý qabyrǵalary jáne uzyndyǵy 250 jáne 150 metr bolatyn eki pontondyq jaıaý júrginshiler ótkeli bolady.
Sonymen qatar, jaǵajaı aımaqtaryna jańa qum tóseledi. Kelýshilerge yńǵaıly bolý úshin irgeles aýmaqta: oryndyqtar, qoqys jáshikter, bar ústelderimen pergolalar, fýdkort paıda bolady. Belsendi demalys úshin rollerdromy bar skeıtpark, trenajerlar, parkýrǵa arnalǵan oryn, velopark, tennıs korttary jáne balalar qalashyǵy jasalady.
Aýmaqty kógaldandyrýǵa erekshe nazar aýdarylady: 4 myńǵa jýyq aǵash, 7 myń sharshy metr jasyl jelekten jasalǵan qorshaý, gúlzarlar, 300 myń sharshy metr túrli shóp otyrǵyzý josparda. Sonymen qatar, Saıranda alǵash ret sý ósimdikteri – lotos paıda bolady.
Abattandyrý jobasynda 5 qoǵamdyq dárethana men ıtterdi serýendetýge arnalǵan qorshalǵan alań jasaý kózdelgen. Demalýshylardyń qaýipsizdigi 2 polıtsııa pýnkti, 2 qutqarý beketin salý esebinen qamtamasyz etiletin bolady. Demalys aımaǵynyń perımetri boıynsha beınebaqylaý kameralary men dabyl túımeleri iske qosylady.
«Biz eki jaǵalaýdan uzyndyǵy 2,5 shaqyrym bolatyn biryńǵaı serýendeý jaǵalaýyn jasaımyz. 250 jáne 150 metrlik eki pantondy ótkel bar. Jaǵalaý eni 11 metrge uzarady. Tóle bı kóshesi jaǵynan biz saıabaqty shýdan, qurap ketýden qorǵaıtyn jáne onyń tolyq aıaqtalǵanyn bildiretin aýqymdy jasyl aımaq jasaımyz. Jalpy, biz belsendi demalys aımaǵyn quratyn bolamyz. Tennıs alańyna jáne qysqy muz aıdynyna arnalǵan jelilerdi tartatyn bolamyz», - dep atap ótti Nellı Lapteva.
Abattandyrý jobasymen tanysqan qala basshysy kelýshilerge arnalǵan parkıngti oılastyrýdy, jasyl jelekterge durys kútim jasaýdy tapsyrdy.
Aýdan turǵyndary Almaty ákimi Erbolat Dosaevqa Saıran kóli aýmaǵynyń aýqymdy ózgeretini úshin alǵystaryn bildirdi.
«Saıran týraly bizdiń ótinishterimizge nazar aýdarǵanyńyz úshin rahmet. Óte jaqsy joba», - dedi qala turǵyndary
Megapolıs basshysy jalpyqalalyq jobalardyń basty maqsaty – qalanyń barlyq aýdandaryndaǵy almatylyqtardyń jaılylyǵy men qaýipsizdigi ekenin atap ótip, polıortalyqtardy damytý aıasynda mundaı tartylys núkteler qatarynyń artatynyn aıtty.
Jobany iske asyrý jáne jaǵalaýdy paıdalanýǵa berý kóktemgi ósimdik otyrǵyzýdan keıin 2025 jyldyń mamyryna josparlanyp otyr. Jańarǵan jaǵalaý Almaly jáne Áýezov aýdandary turǵyndary úshin tartymdy ortalyq bolady jáne bir ýaqytta munda 3 myńnan astam adam tynyǵa alady dep boljanýda.
Buǵan deıin qala ákimdigi jobanyń eskızderin usynǵan bolatyn.
Eske salsaq, Almaty ákiminiń tapsyrmasy boıynsha 2022 jyly sońǵy 50 jyl ishinde alǵash ret Saıran sý qoımasynyń túbi qoqys pen laı shógindilerden mehanıkalyq túrde tazartyldy.
Abattandyrylǵan aýmaqtyń jalpy aýdany 46,79 gektar.
