Saıran kólinde abattandyrý jumystary aıaqtalmaı jatyp, tazalyq máselesi týyndady
ALMATY. KAZINFORM – Almatyda Saıran kóliniń jaǵalaýy resmı túrde áli ashylǵan joq. Alaıda qala turǵyndary jańartylǵan demalys aımaǵynda qoqys qaldyryp jatyr Kazinform agenttiginiń fototilshisi qazir aýmaqtyń qandaı kúıde ekenin kórsetti.
Áleýmettik jelilerde qala turǵyndary men qonaqtary 2023 jyldan beri abattandyrylyp jatqan Saırannyń sýretteri men vıdeolaryn belsendi túrde bólisip jatyr.
Bul jerde keıingi 50 jylda alǵash ret kól tabany mehanıkalyq jolmen tazartylǵan bolatyn.
Jańartylǵan aýmaqty mamyr aıynyń sońyna qaraı ashý josparlanǵan edi, biraq jumystar áli aıaqtalǵan joq.
Ol resmı túrde ashylmasa da, demalys ornyna kelýshiler sany artty. Jaǵalaý men kóldiń betinde qalqyp júrgen qoqysty baıqaýǵa bolady.
Qoǵamdyq keńistikterdi damytý basqarmasy tazalyq máselesin qalaı sheshetinderin túsindirdi.
Vedomstvo ókilderiniń aıtýynsha, nysan áli paıdalanýǵa berilgen joq, al abattandyrý elementteriniń bir bóligi, sonyń ishinde qoqys jáshikteri men shaǵyn sáýlettik formalardy ornatý áli de júzege asyrylyp jatyr.
– Jóndeý jumystarynyń barlyq kezeńi aıaqtalǵannan keıin aýmaq qajetti ınfraqurylymmen tolyq jabdyqtalady: jaryqtandyrý, demalys aımaqtary, beınebaqylaý júıeleri ornatylady, - dedi basqarmadan.
Qazir Saıran aýmaǵynda kún saıyn 40 qyzmetker jumys istep, tazalyq jumystaryn júrgizedi. Orta eseppen munda táýligine shamamen 5 tonna turmystyq qatty qaldyq shyǵarylady. Qazirdiń ózinde 124 qoqys jáshigi ornatylǵan.
Basqarmanyń málimetinshe, kólge kún saıyn shamamen 3–4 myń adam keledi. Qoǵamdyq tártip pen qaýipsizdikti qamtamasyz etý maqsatynda polıtsııa, TJD jáne qutqarý qyzmetiniń mamandary kelýshilermen kúndelikti túsindirý jumystaryn júrgizip jatyr.
Perımetr boıyna shomylýǵa tyıym salynǵany jóninde eskertý belgileri ornatyldy.
– Qabyldanyp jatqan sharalarǵa qaramastan, qoǵamdyq tártipti buzý faktileri tirkelip jatyr. Turǵyndar kógaldandyrý men shaǵyn sáýlettik formalardy búldirip, qoqys qaldyryp ketedi. Mundaı áreketter jóndeý jáne abattandyrý jumystaryn edáýir qıyndatyp, josparlanǵan sharalardyń júzege asýyn baıaýlatady, - dep atap ótti vedomstvo ókilderi.
Sonymen qatar qoǵamdyq keńistikterdi damytý basqarmasy qala turǵyndary men qonaqtaryn qoǵamdyq oryndarda mádenıettilik tanytyp, kommýnaldyq qyzmetkerlerdiń eńbegin baǵalap, qalalyq ortaǵa uqypty qaraýǵa shaqyrdy.
– Tazalyqty saqtaý, abattandyrý, kógaldandyrý jáne ınfraqurylym elementterin qorǵaý – ár azamattyń ortaq jaýapkershiligi. Ekologııaǵa jáne qoǵamdyq keńistikterge jaýapkershilikpen qaraý – Almaty qalasyndaǵy jaıly, qaýipsiz jáne tartymdy qalalyq ortany qalyptastyrýǵa árkimniń qosqan úlesi, - delingen basqarmanyń málimdemesinde.
Osyǵan deıin Saıran kóliniń jaǵalaýyna skeıtpark salynatyny týraly jazǵanbyz.
Sondaı-aq Saıran kóliniń jaǵalaýyn abattandyrý jumystary 90 paıyzǵa oryndalǵany týraly jazǵan edik.