Saıran kóliniń jaǵasynda okeanarıým ornalasatyn bolady - Almaty
ASTANA. 11 shilde. QazAqparat - Almatyda Saıran kóliniń shyǵys jaǵalaýynda 0,6 gektar jer aýmaǵynda okeanarıým ornalasatyn bolady.
Atalmysh mádenı nysan jeke ınvestorlar qarjysyna turǵyzylmaq, dep habarlaıdy Eýrazııa birinshi arnasy.
Almaty qalasy Sáýlet jáne qala qurylysy basqarmasy bastyǵynyń orynbasary Janat Aıtileýdiń aıtýynsha, okeanarıým qurylysy kelesi jyly bastalyp, bir-bir jarym jylǵa sozylýy múmkin.
Aıta keteıik, Almatyda okeanarıýmnyń paıda bolatyny týraly aqparatty aqpan aıynyń basynda qala ákimi Ahmetjan Esimov jetkizgen. Ol óz sózinde: «Biz eger, múmkin bolsa, bıyl nemese kelesi jyly okeanarıým salýdy josparlap otyrmyz. Bilesizder me, okeanarıým - tek ádemilik qana emes, ol belgili bir dertke shaldyqqan balalardy emdeýge qoldanylady. Sondyqtan biz Saıran kólin jaqsartý jumystaryna kirisemiz», - degen bolatyn.
