Saıran kóli men Esentaı jaǵalaýyn abattandyrýǵa mıllıard teńge jumsalady
ALMATY. KAZINFORM – Saıran kóliniń jaǵalaýy men Esentaı ózeniniń jaǵalaýynda bıyl abattandyrý jumystary júrgiziledi.
Memlekettik satyp alý saıtynda atalǵan jumystarǵa baılanysty eki lot jarııalanǵan. Onyń biri Esentaı ózeniniń jaǵasynda Ál farabı dańǵylynan Jamaqaev kóshesine deıin landshafttyq kompozıtsııalar jasaý jobasy, quny – 482 248 042 teńge.
Ekinshi joba – Saıran kóliniń jaǵasynda landshafttyq kompozıtsııalar jasaý, oǵan 548 071 520 teńge qarastyrylǵan.
Esentaı ózeniniń boıyndaǵy joba boıynsha 7 myń sharshy metrden astam aýmaqqa kópjyldyq ósimdikter, sándik maqsatta 2 myń sharshy metrge jýyq birjyldyq gúlder men qyzǵaldaqtar egiledi. 8 650 dana gortenzııa butasy otyrǵyzylady. Jaıaý júrginshiler úshin 3 myń sharshy metrden astam aýmaqty qamtıtyn ekojoldar salynady. Al Saıran kóliniń jaǵalaýynda kógaldandyrýdyń jańa kezeńi qolǵa alynady. Onyń ishinde: 10 myń sh.m. aýmaqqa gortenzııa butalary otyrǵyzylyp, maýsym boıy kútim jasalady. 3 myń sh.m. astam jerge kópjyldyq ósimdikter egilip, ekojoldar tóseledi. Sondaı-aq birjyldyq gúlzarlar men qyzǵaldaq alqaby paıda bolady.
Eki lot boıynsha ótinimderdi qabyldaý 22 sáýirde bastalady jáne 29 sáýirge deıin jalǵasady.
Eske salaıyq, 2023 jyldan bastap Saıran kóliniń jaǵasyn jańǵyrtý jobasy qolǵa alyndy. 2025 jyly resmı ashylýy ótpese de, kól jaǵalaýyndaǵy negizgi jumystar aıaqtalyp, paıdalanýǵa berildi.
Sondaı-aq byltyr Almaty ákimdigi Ál-Farabı dańǵylynan bastap Rysqulov dańǵylyna deıingi 7,2 shaqyrym bolatyn ózen arnasyn jańartylatynyn habarlady. Bul jobany júzege asyrýǵa 11 mıllıard teńge jumsalmaq.
