Saıramsý shatqalynda eki adam taýdan qulap ​ketken

ShYMKENT. QazAqparat – Túrkistan oblysynyń Tóle bı aýdanynda Saıramsý shatqalyna shyqqan týrıster tobyndaǵy eki adam qulap ketken. 39-daǵy áıel adam kóz jumyp, 42 jastaǵy er adamdy aýyr kúıde tabyldy, dep habarlaıdy QazAqparat Shymkent qalasynyń TJD baspasóz qyzmetine silteme jasap.

23 tamyzda «112» qutqarý qyzmetine Saıram-Ógem ulttyq tabıǵı parkiniń aýmaǵynda Qasqasý aýylynan 30 shaqyrym jerde týrıster toby taýǵa shyǵyp, joǵalyp ketken. Bul týraly taýdan shyqqan týrıster tobynyń múshesiniń biri habarlaǵan.

«Oqıǵa Saıram-Ógem ulttyq parkiniń aýmaǵynda, Saıramsý taý shatqalynda, «Saıram« muzdyǵynda, teńiz deńgeıinen 4 236 m bıikte bolǵan. Bastapqy málimet boıynsha 5 adamnan qurylǵan top 23 tamyzda saǵat 18.05-te taýǵa shyqqan. Sodan keıin olar taýdan túsip kele jatqan qarsy toptan kómek surap, olardan arqan suraǵan. Olardyń aıtýynsha,1978 jyly týǵan er adam men 1981 jyly týǵan áıel shatqalǵa qulap ketken», delingen habarlamada.​

Atalǵan aýmaq boıynsha basshy Rahymjan Bekenbaevtyń basshylyǵymen quramynda 5 adam bar qutqarýshy toby sol kúni keshke shyqty. Qutqarýshylar kólikpen jazǵy kempıngke jetip, ári qaraı kólikpen júrý múmkin bolmaǵandyqtan jaıaý júrgen.
«Saǵat 14.00-degi jaǵdaı boıynsha qutqarý toby teńiz deńgeıinen 3 500 m bıikte 42 jastaǵy zardap shekken er adamdy tapty (qabyrǵasy synǵan, úsigen, tynys alýy qıyn, jaǵdaıy aýyr). 39-daǵy áıeldiń denesi teńiz deńgeıinen 3 800 m bıikte tabylǵandyqtan, saǵat 15.00-de qutqarýshylar áıeldiń denesin tómenge túsirý úshin taǵy 300 metr joǵary kóterildi.​ Qutqarý operatsııasy tik jartastarǵa, muz shógindisine baılanysty qıynǵa soqty. Qutqarýshylar alpınıst jabdyqtaryn qoldanýda», delingen habarlama.
Aıta keterligi, shymkenttik qutqarýshylar jyl basynan beri izdestirý-qutqarý jumysyn júrgizý úshin taýǵa 4 ret shyqqan. Nátıjesinde 4 adam qutqarylǵan (onyń ishinde 2 bala, 1-eýi qaıtys bolǵan).