Saıramnyń jıhazdary Ázerbaıjan men Ózbekstanǵa eksporttalyp jatyr
Aqsý ózeni boıyn abattandyrý jumystarymen tanysqan soń óńir basshysy «Saıram sút» JShS-ne bardy. 50 adam jumys isteıtin kásiporyn táýligine 20 tonna sút ónimderin óndiredi. Ómirzaq Estaıuly aýdan basshysyna atalǵan kásiporynǵa sýbsıdııa alý boıynsha jeńildikterdi talapqa saı qarastyrý qajettigin tapsyrdy.
Sondaı-aq, oblys ákimi Saıram aýdany, Mankent aýylyndaǵy «Balym-aı» balabaqshasynyń jumysymen tanysty. 2019 jyly iske qosylǵan balabaqshada búginde 280 bala tárbılenýde. Onda 70 adam jumyspen qamtylǵan.
Saıram aýdany et eksporttaýdan kóshbasshylar qatarynda ekeni jurtqa málim. Aýdandaǵy et óńdeýmen aınalysatyn kásiporyndardyń biri - Mankent aýylynda ornalasqan «Et Agro Mankent» STK. Kásiporyn mal bordaqylaý, et óndirý, mal soıý jáne et saqtaýmen aınalysady. Jobanyń qýattylyǵy - táýligine 20 tonna. Óndiris ornynyń jumysymen tanysqan oblys ákimi et eksporty boıynsha Túrkistan oblysy respýblıkada kósh bastap turǵanyn atap ótip, áli de eksport kólemin arttyrý kerektigin aıtty.
Odan bólek, oblys ákimi Saıram aýdanyndaǵy «Bella Mebel» jıhaz óndiretin fabrıkasynyń jumysymen de tanysty. Búgingi tańda fabrıkada 120-ǵa jýyq adam jumys isteıdi. Jalpy fabrıkanyń ónimderi tek qana Qazaqstanǵa ǵana emes, Ázerbaıjan, Ózbekstan memleketterinde de úlken suranysqa ıe. Ótken jyly fabrıka 496,4 mln teńgeniń ónimin óndirgen, bıyl ónim kólemin arttyrý josparlanyp otyr. Ómirzaq Estaıuly kásiporyn ıesine Túrkistan qalasyndaǵy ındýstrıaldy aımaqtan jıhaz fabrıkasyn salýdy usyndy. Kásipker atalǵan ıdeıany tez arada qolǵa alatynyn jetkizdi.
Jumys sapary sońynda Aqsý aýylyndaǵy «Asyl LTD» JShS-niń jetistikterin kórgen oblys basshysy tek un óndirýmen toqtalyp qalmaı, bıdaı ónimin ártaraptandyrý kerektigin aıtty. Búginde táýligine 3000 tonna un shyǵarýǵa qabiletti dıirmenniń uny elimizben qatar Ózbekstanǵa eksporttalyp jatyr.
