Saıramdyqtar egistikti qoıdyń qany aralasqan sýmen sýarýǵa májbúr
Áleýmettik jelide Qarabulaq turǵyndarynyń janaıqaıy jarııalandy. Olardyń aıtýynsha qoıdyń qan qaldyqtaryn kez kelgen jerge tógip ketetin qasapshylardyń áreketinen el zardap shegip otyr. Sonyń saldarynan aýyl ishindegi aryq sýlary qyzaryp ketken. Al ol sýdy jergilikti turǵyndar egistikke paıdalanýǵa májbúr.
Tabıǵat janashyry Ǵanı Nazarbek bul máselege beı-jaı qaraýǵa bolmaıtynyn jetkizdi.
«Túrkistan oblysy Saıram aýdany aýmaǵynda epıdemıologııalyq jaǵdaıǵa taldaý júrgizý qajet. Aýdan aýmaǵynda kóptegen boınıalar bar. Ol jerlerde kúndelikti myńdaǵan bas mal soıylyp jatyr. Al olardan shyqqan qaldyqtardy óńdeý, zalalsyzdandyrý oryndary joq. Qaldyqtardy (teri, bas-sıraq, qan, ishki organdar) ruqsat etilmegen jerlerge tastap jatyr. Ondaı oryndar kún saıyn kóbeıip keledi. Myńdaǵan tonna qan jerasty sýlaryna qosylýda, basqa qaldyqtar ashyq dalada sasyp jatyr», - deıdi ol.
Al Saıram aýdany ákimdiginiń baspasóz qyzmeti búgin aýdan ákiminiń orynbasary M.Orazalıev Qarabulaq aýyldyq okrýgine baryp, turǵyndarmen kezdeskeninin aıtty.
«Saıram aýdany Aqsýkent aýylynyń tazartqysh ǵımarattaryn qaıta qurý» nysany týraly mán-jaı men osy nysannyń syrtqy aýmaqtarynda sanıtarlyq talaptardy saqtaý kerektigi túsindirildi. Sondaı-aq tártiptiń saqtalýyn qadaǵalaý úshin aýdandyq polıtsııa basqarmasynyń qyzmetkerleri búginnen bastap táýliktik kezekshilikke túsetin bolady. Turǵyndardyń shuńqyr qazý jáne joldardy ashý týraly ótinishi nazarǵa alyndy. Bul baǵytta arnaıy tehnıkalardyń kómegimen jumys júrgiziletini týraly kelisimge keldi», - delingen aqparatta.
Sondaı-aq búgin aýdandyq máslıhat depýtattary men sala mamandary da Qarabulaq aýylynyń turǵyndarymen kezdesken.
Nátıjesinde, aýdandyq turǵyn úı-kommýnaldyq sharýashylyq bólimi men «Saıram tazalyq» JShS tarapynan arnaıy tehnıka bólinip, shaıyndy sýlar jınalatyn oryndar tazalanatyn boldy.
Sonymen qatar aýdandyq máslıhat tarapynan quzyrly organdarǵa oryn alǵan kemshilikterdi joıýǵa jáne kináli azamattardy jaýapkershilikke tartý týraly usynyshat ta joldandy.
