Saıramdyq soǵys ardageri daýys berýdiń mańyzdylyǵy týraly aıtty

TÚRKІSTAN. QazAqparat – Saıram aýdanynyń 96 jastaǵy turǵyny, soǵys ardageri Ahmedjan Anartaev referendýmǵa qatysty. Qarııa daýys berýdiń mańyzdylyǵy týraly aıtty, dep habarlaıdy QazAqparat tilshisi.

Ardager Saıram aýdany Qarabulaq aýyldyq okrýgindegi №580 referendým ýchaskesinde óz tańdaýyn jasady.

«Eldiń bolashaǵy úshin árbir qazaqstandyq referendýmda óz daýysyn berýge mindetti dep esepteımin. Bul el erteńine degen senimimizdi nyǵaıtady. Búgingideı el eńsesin tiktegen shaqta aýyzbirligimiz myqty bolýy tıis. Biz sonda ǵana almaǵaıyp shaqtardan aman ótemiz», - dedi qarııa.

Ardager saıası naýqannyń sátti ótýine tilektestigin bildirip, aq batasyn berdi.

Aıta keteıik, Ahmedjan Anartaev 1926 jyly Saıram aýdanyndaǵy Qarabulaq aýylynda dúnıege kelgen. Polshany azat etý jolyndaǵy shaıqastarǵa, Germanııadaǵy urystarǵa qatysqan. ІІ dárejeli «Otan soǵysy» ordenimen, «Germanııany jeńgeni úshin» medalimen jáne mereıtoılyq segiz medalmen marapattalǵan. Qazir Qarabulaq aýylynda turady. 9 balasynan 28 nemere, 5 shóberesi súıip otyr.

Buǵan deıin habarlaǵanymyzdaı, Túrkistan oblysy Maqtaaral aýdanynyń 85 jastaǵy turǵyny Jandarbek Júsipov alǵashqylardyń biri bolyp daýys bergen edi.

Sondaı-aq, daýys berýshi arystyq turǵyn shashý shashsa, saryaǵashtyq zeınetkerge shapan jabyldy.

Al, ǵasyr jasaǵan Arys qalasynyń turǵyny Rysaldy Beısenbaeva nemerelerin erte keldi.

Túlkibastyq ustazdar dınastııasy da otbasylyq dástúri boıynsha óz tańdaýyn jasady.