Saıramdyq baǵban bir túp almadan 5 túrli ónim alyp otyr
Saıramdyq sharýa Ikramjan Rozaqulov 20 jyldan beri alma ósirýmen aınalysyp keledi. Alǵashqyda 70 sotyq jerge alma kóshetterin otyrǵyzǵan ol mol ónim alyp, shet elge deıin eksporttaǵan. Keıinnen baý-baqshany 2 gektarǵa ulǵaıtyp, túrli alma kóshetterin otyrǵyzdy. Onnan astam almanyń sortyn egip, shaǵyn sharýashylyqty úlken alma baqqa aınaldyrdy. Qazir sharýanyń baý baqshasynda alma aǵashtary jaıqalyp ósip tur. Jyl saıyn 60-70 tonnaǵa jýyq ónim alyp, satylymǵa shyǵarýda.
«Jyl saıyn shetelge eksporttap, mol tabys tabatynbyz. Sońǵy eki jyl kóleminde elde ornaǵan karantın saýdamyzdy tómendetip jiberdi. Bıyl da mol ónim jınaldy. Degenmen, alýshy az» - deıdi sharýa.
Búginde Ikramjan Rozaqulov alma aǵashtaryn býdandastyryp, bir túpke 5 túrli alma ósirip otyr. ıAǵnı, bir tamyrdan shyqqan aǵashta golden, delıshes, veınsep, star krımson, melba, bes julduz atty alma sorttary ósip tur. Qazir golden men delıshes ónim bergen. Al, qalǵan úsh sorttyń ónimi endi jınalady.
«Men ózim Tashkentke baryp úsh aı oqyp keldim. Sondaǵy sharýalardyń qasynda júrip tájirıbe jınadym. Qazir bar úırengenimdi óz baý-baqshama qoldanyp kelemin. Sondaı-aq, kómek suraýshylarǵa úıretip jatyrmyn. Jýyrda Shymkenttegi bir sharýanyń úıinde bolyp, ondaǵy bir túpke 10 túrli almanyń kóshetin otyrǵyzyp berdim. Onyń 5,6 túri ǵana ónip, ónim berýi múmkin» - deıdi sharýa.
