Saıramdaǵy dámhanadan Qyzyl kitapqa engizilgen úki tabyldy
TÚRKІSTAN. QazAqparat – Saıramdyq polıtseıler Mankent aýylynda ornalasqan dámhanalardyń birinen Qyzyl kitapqa engizilgen úkini tapty, dep habarlaıdy QazAqparat.
Saıram APB-nyń Tabıǵatty qorǵaý polıtsııa tobynyń ınspektory polıtsııa aǵa leıtenanty M.Botabek jáne Ákimshilik polıtsııa bóliminiń ınspektory polıtsııa aǵa leıtenanty M.Qýandyqov ekologııalyq qylmystardyń aldyn alý jónindegi jedel-profılaktıkalyq is-sharalar júrgizý barysynda Mankent aýylynda ornalasqan kafelerdiń biriniń aýlasynan asyraýǵa tyıym salynǵan úlken úkini anyqtady.
Atalǵan jaıt QR QK-niń 339-baby «Sırek kezdesetin jáne quryp ketý qaýpi tóngen, sondaı-aq paıdalanýǵa tyıym salynǵan ósimdikter men janýarlar túrlerin, olardyń bólikterin nemese derıvattaryn zańsyz paıdalaný» boıynsha tirkelip, sotqa deıingi tergeý amaldary júrgizilýde. Aıǵaqty zat retinde alynǵan qus QR «Qyzyl kitabyna» engizilgen «Fılın-Úkisi» bolyp shyqty. Ol Shymkent qalasynyń haıýanattar baǵyna jiberildi. Tártip saqshylary kúdikti turǵynnyń«Qyzyl kitapqa» engen qusty qandaı maqsatta ustaǵanyn anyqtaýda. Sondaı-aq tergeý barysynda turǵyn bul qusty 2015 jyldan beri asyrap kele jatqanyn jetkizgen. «Túrkistan oblysynyń polıtsııa qyzmetkerleri azamattarǵa QR «Qyzyl kitabyna« engizilgen sırek kezdesetin janýarlarmen zańsyz baılanys jasap, ustaǵandar 3 myń AEK deıingi aıyppul nemese 3 jylǵa deıingi merzimge bas bostandyǵynan shekteý nemese aıyrý túrindegi qylmystyq jaýapkershilik qarastyrylǵanyn eskertedi», delingen baspasóz qyzmetiniń habarlamasynda.
