Saıramda jurttyń aqshasyn alaıaqtyqpen alǵan kúdiktiler ustaldy
TÚRKІSTAN. QazAqparat - Túrkistan oblysynyń Saıram aýdanynda turǵyndardy «áleýmettik kómek alýǵa, jumysqa ornalasýǵa kómektesemin» dep aldaǵan kúdikti ustaldy, dep habarlaıdy QazAqparat tilshisi.
Oblystyq PD baspasóz qyzmetiniń málimetinshe, Saıram aýdanynyń turǵyny polıtsııa basqarmasyna bir tanysynan aldanyp qalǵany jóninde aryzdanǵan. Onyń aıtýynsha, kúdikti áleýmettik kómek alyp beremin dep onyń 15 myń teńgesin aldap alǵan.
«Jedel-izdestirý sharalarynyń barysynda kúdikti degen jergilikti turǵyn ustaldy. Tergeý barysynda onyń birneshe alaıaqtyq iske qatysy bar ekeni anyqtaldy. Jábirlenýshilerge keltirilgen shyǵyn kólemi 100 myń teńgege jetken. Qazirgi kezde atalǵan jáıt boıynsha QR QK-niń 190-baby «Alaıaqtyq» boıynsha sotqa deıingi tergep-tekserýdiń biryńǵaı tizilmine tirkeldi. Tergeý boıynsha jınaqtalǵan materıaldar sotqa joldandy», delingen habarlamada.
Taǵy bir alaıaqtyq qylmysyna qatysy bar degen kúdikti Saıram aýdanynda ustaldy. Jedel-izdestirý sharalarynyń barysynda onyń Túlkibas aýdany turǵynynyń senimine kirip, jumysqa ornalastyramyn dep aldaǵany anyqtalǵan. Sol arqyly jábirlenýshiniń 120 myń teńgesin alyp qoıǵan. Qazirgi kezde atalǵan aıǵaq boıynsha sotqa deıingi tergep-tekserý amaldary júrgizilýde. Polıtseıler kúdiktiniń basqa da osyndaı qylmystarǵa qatystylyǵyn anyqtaýda.
