Saıramda «Jasyl ekonomıka» aıasynda eki joba júzege asyrylýda - OQO
ASTANA. QazAqparat -Ońtústik Qazaqstan oblysynyń Saıram aýdanynda «Jasyl ekonomıka» baǵdarlamasy aıasynda ózen sýy men kún kózinen elektr energııasyn óndiretin 2 joba júzege asyrylýda, dep habarlaıdy Ońtústik Qazaqstan oblysynyń ákimdiginiń baspasóz qyzmeti.
Baspasóz málimetterine qaraǵanda, balamaly energııa kózin óndirýmen aınalysatyn «Aqsý Energo» JShS-iniń Aqsý ózeninen elektr energııasyn alatyn gıdroelektr stansasy bar. «Bıznestiń jol kartasy-2020» baǵdarlamasy boıynsha qolǵa alynǵan bul stansa táýligine 2,5 MVt elektr qýatyn óndiredi. Óndirgen qýatyn kásiporyn «Ońtústik Jaryq» kompanııasyna jiberip otyrady.
Seriktestiktiń ekinshi jobasy - elektr qýatyn kún kózinen óndirýge baǵyttalǵan. Bul úshin 2,5 gektar aýmaqqa kúnnen qýat alatyn 4 myńnan astam batareıa ornatylǵan. Ornatylǵan kún panelderi men óndirilgen elektr qýatyn bir jerge toptastyryp, ortaq transformatorǵa jiberetin qurylǵy Qytaı elinen ákelingen. Ótken jyly kún kózinen 987,166 MVt bolatyn toq óndirilgen. Jalpy elektr stansasy saǵatyna 1 MVt elektr qýatyn óndiredi. Bul shamamen 50 otbasyny jaryqpen qamtýǵa jetkilikti.
Kún kózinen energııa alý isi jazdy kúni jandansa, gıdroelektr stansasy bul mezgilde egistikti sýarý kezi bolǵandyqtan jumysyn ýaqytsha toqtatady.
Astana qalasynda ótetin «EKSPO-2017» halyqaralyq mamandandyrylǵan kórmesiniń basty ustanymy osy «Jasyl ekonomıkany» damytý bolyp tabylatyndyǵyn aıta ketken jón.
