Saıramda tórt kólik urlandy
ShYMKENT. QazAqparat - Ońtústik Qazaqstan oblysynyń Saıram aýdanynda tórt kólik urlandy. Óńirdiń tártip saqshylary osy 4 urlyq deregine qatysy bar degen qylmystyq topty qolǵa túsirdi, dep habarlaıdy QazAqparat tilshisi.
Oblystyq ІІD baspasóz qyzmetiniń málimetinshe, Saıram aýdandyq ishki ister basqarmasyna jergilikti turǵyn aryzdanyp, onda belgisiz tulǵanyń úıiniń aýlasynda turǵan jeńil avtokóligin jasyryn aıdap ketkenin kórsetken. Artynsha dál osyndaı aryz aýdannyń taǵy úsh turǵynan túsken. Atalǵan derekter boıynsha tártip saqshylarynan arnaıy jedel toby qurylyp, jan-jaqty izdestirý sharalary júrgizildi. Nátıjesinde, izi sýymaı osy qylmystarǵa qatysy bar degen úsh kúdikti ustaldy.Tergeý barysynda top músheleriniń urlyq áreketterin túngi ýaqyttarda iske asyrǵany anyqtaldy. Olar jeke úılerdiń aýlasynda jáne kóshe boıynda turǵan qaraýsyz avtokólikterdi urlap otyrǵan. Qoldy bolǵan avtokólikterdi qala syrtyna aıdap áketip, dońǵalaqtary men akkýmýlıatorlaryn sheship kelgen. Sóıtip, satý oryndaryna ótkizip júripti. Qazirgi tańda ustalǵandardyń ústinen Qylmystyq kodekstiń «Avtomobıldi nemese kólik quralyn jymqyrý maqsatynsyz quqyqqa syıymsyz ıemdenip alý» babymen is qozǵalyp, sotqa deıingi tergeý amaldary júrgizilýde. Kúdiktiler qamaýǵa alynyp, olardyń basqa da urlyq qylmystaryna qatystylyǵy tekserilý ústinde.
