Saıramda toǵyz ret mal urlaǵan barymtashylar ustaldy
SAIRAM. QazAqparat – Túrkistan oblysy, Saıram aýdanynda toǵyz ret mal urlyǵyn jasaǵan barymtashylar ustaldy, dep habarlaıdy QazAqparat tilshisi.
Qazirdiń ózinde olardyń jábirlenýshilerge 2 mıllıon teńgeden asa shyǵyn keltirgeni anyqtalyp otyr.
Oblystyq PD baspasóz qyzmetiniń málimetinshe, kúdiktilerdi ustaýǵa jergilikti turǵyndardyń aryzy negiz bolǵan. Olardyń biri aǵymdaǵy jyldyń naýryz aıynda sharýa qojalyǵynan jalpy quny 350 myńǵa jýyq teńge bolatyn eki sıyry urlanǵanyn jetkizgen. Osyndaı aryzdar basqa da aýyl turǵyndarynan túsken. Atalǵan qylmysty ashý maqsatynda polıtsııadaǵy tájirıbeli qyzmetkerler qatarynan jedel-tergeý toby qurylyp, olar jedel izdeý sharalaryn júrgizedi.
Nátıjesinde, ákki barymtashylar qolǵa túsken. Onyń ekeýi buryn sotty bolǵan jergilikti turǵyndar ekeni anyqtalady. Tergeý barysynda kúdiktilerdiń 9 mal urlyǵyna qatysy bar ekendigi dálelin tapty. Qazirgi tańda atalǵan jaıttar boıynsha SDTBT-ne QR QK-niń 188-baby «Urlyq» boıynsha tirkeledi.
«Tergep-tekserý kezinde anyqtalǵandaı, urylar jábirlenýshilerdiń beıqamdyǵyn paıdalanyp, túnde sharýashylyqqa kirip júrgen. Maldardy urlap, sodan keıin qylmys ornynan boı tasalap otyrǵan. Urlanǵan maldardy jergilikti bazarlarda satyp, aqshany óz qajettilikterine jumsaǵan. Qazirgi tańda tergep-tekserýden jınalǵan barlyq materıaldar sheshim shyǵarylý úshin sotqa joldandy» - delingen habarlamada.
