Saıramda temir qorshaýǵa basy qystyrylyp qalǵan 4 jasar bala qutqaryldy
SAIRAM. QazAqparat - Túrkistan oblysynyń Saıram aýdanynda polıtseıler temir qorshaýǵa basy qystyrylyp qalǵan 4 jasar balaqaıdy qutqardy, dep habarlaıdy QazAqparat oblystyq polıtsııa departamenti baspasóz qyzmetine silteme jasap.
Saıram aýdandyq PB patrýldik polıtsııa qyzmetkerleri Mankent aýylynda kósheni kezekti patrýldeý kezinde, túski ýaqytta kútpegen jaıtqa kez bolady. Tasjol boıynda ornalasqan jabyq turǵan qurylys zattary dúkeniniń qorshaýynda qystyrylyp turǵan 4 jasar balany baıqaıdy. Inspektorlar - Nurbolat Tileýbergenov, Erkin Álmetov, Ǵalym Dáýkenovter dereý keri burylady. Temir tor qorshaýdan ótemin dep, basy syımaı qystyrylyp qalǵan balany tez arada bosatyp alady.
Balaqaıdyń anasy dúkenge baryp kelemin dep, úıinen shyǵyp ketken. Onyń izin sýytpaı balasy artynan júgirip shyqqan. Qurylys zattaryn satatyn dúken aýmaǵyna kirmek bolǵanda, qorshaýǵa syımaı, basy qystyrylyp qalǵan. Sol mezette osy mańnan ótip bara jatqan polıtseıler ony tez arada shyǵaryp, úıine aparady.
Balanyń ata-anasyna aldaǵy ýaqytta balaǵa saq bolý kerektigi estkertilip, túsindirme jumystary júrgizildi. Óz kezeginde Túrkistan oblysynyń polıtsııa qyzmetkerleri azamattardy balaryna saq bolýǵa jáne densaýlyǵynyń jaı-kúıin baqylaýda ustap júrýge keńes beredi.
