Saıramda kásiptik oqýmen qamtylǵan 250 túlekke kýálik berildi - OQO
ShYMKENT. QazAqparat - Bıyl Ońtústik Qazaqstanda qysqa merzimdi kásiptik oqytýǵa joldanǵan 11920 adamnyń 3991 oqýdy aıaqtap, 1000 maman jumysqa ornalasqan, dep habarlaıdy OQO ákiminiń baspasóz qyzmeti.
Sondaı-aq,óńir basshysy J.Túımebaevtyń tapsyrmasyna sáıkes aýdan, qala ákimdikterinde árbir aýyl okrýgine qajetti 30 túrli mamandyq boıynsha 8676 azamat oqýǵa joldanǵan bolatyn. Búginde olardyń 8676 adamnyń 723-i turaqty jumysqa ornalasqan. Búgin Saıram aýdanynda ótken «Altyn kúz» merekesinde oblys ákimi Janseıit Túımebaev osy baǵdarlama aıasynda bilim alǵan 20 mamanǵa saltanatty túrde kýálik tabys etti.
Óńir basshysy aldymen Saıram aýdanyndaǵy kásiptik-tehnıkalyq kolledj túlekteri daıyndaǵan arnaıy kórmeni aralap shyqty. Jurt nazaryn ózine aýdarǵan jobalardyń biri - kirpish quıatyn qurylǵy boldy. Kádimgi temirmen jasalǵan qondyrǵyny kolledj túlekteri ózderi oılap tapqan. Jýyrda olar osy jobasymen oblystyq baıqaýǵa qatysyp, júldegerler qatarynan kórinipti.
Al, Dinmuhammed Qonaev atyndaǵy kolledjdiń stýdentteri plastıkalyq zattardyń qaldyǵyna qum men tús beretin qospa qosyp, úı aýlasyna qoldanylatyn tósenish oılap taýypty. Oblys ákimi stýdentterdiń bul jobasyna tańdanys bildirip, jastardy zamanaýı úzdik jobalardy ázirleýge yntalandyrý qajettigine toqtaldy.
«Qazirgi tańda oblysymyzdaǵy aýdan, qalalardaǵy eldi mekenderde kásiptik mamandar tapshylyǵy baıqalyp otyr. Qarapaıym mysal, bir aýylǵa elektrık, slesar, dánekerleýshi, aǵash ustasy sekildi qajetti mamandyqtar jetispeıdi. Tipti joq dep aıtsaq ta bolady. Osyny eskere otyryp biz bıyldyń ózinde 30 túrli qajetti mamandyqtar boıynsha 9 myńǵa jýyq azamatty qysqa merzimdik oqýǵa joldaǵan bolatynbyz. Jýyrda sol mamandar barlyq aýyl okrýgterine jiberilip, jumyspen qamtylatyn bolady», - dedi Janseıit Qanseıituly.
Aıta keteıik, bıyl oblysymyzda «Nátıjeli jumyspen qamtýdy jáne jappaı kásipkerlikti damytýdyń 2017-2021 jyldarǵa arnalǵan baǵdarlamasyn» iske asyrýǵa respýblıkalyq bıýdjetten 11429,8 mln. teńge bólingen bolatyn. Nátıjesinde 64 myń 314 adamdy qamtý kózdelgen. 2017 jyldyń 1 qazanyna bólingen qarjynyń 6,4 mlrd. teńgesi nemese 56,1 paıyzy ıgerilip, 68534 baǵdarlama qatysýshysy áleýmettik qoldaý sharalarymen qamtyldy.
