Saıramda grek-rım kúresinen respýblıkalyq ashyq birinshilik ótti
AQSÝKENT. QazAqparat – Túrkistan oblysy Saıram aýdanynyń ortalyǵy Aqsýkentte grek-rım kúresinen jasóspirimder arasynda respýblıkalyq ashyq birinshilik jarystary ótti. Baıraqty básekege óz elimizden bólek, kórshiles Ózbekstan men Qyrǵyzstan elderiniń balýandary kelip, baq synady, dep habarlaıdy QazAqparat tilshisi.
Elimizde sportty damytý maqsatynda kóptegen halyqaralyq, álemdik deńgeıdegi jarystar uıymdastyrylyp júr. Osyndaı aıtýly dodalardyń biri - bıyl XXVIII ret jalaýy kóterilgen grek-rım kúresinen dástúrli túrde ótetin akademık Mardan Saparbaevty eske alýǵa arnalǵan týrnır. Bul jarys jyl saıyn eresekter men jasóspirimder arasynda joǵary deńgeıde ótip keledi.
Jarystyń ashylý saltanatyna qatysqan Túrkistan oblystyq dene shynyqtyrý jáne sport basqarmasynyń basshysy Polat Qyryqbaev quttyqtaý sóz sóılep, halyqaralyq dodanyń mańyzyna toqtaldy.
«Bul týrnırden shyńdalyp shyqqan balýandardyń talaıy olımpıada oıyndarynda jeńimpaz jáne júldeger atandy. Aldaǵy ýaqytta da jarystyń aýqymyn keńeıtip, halyqaralyq deńgeıde uıymdastyramyz»,- dedi Bolat Qyryqbaev.
Atalmysh saıysta bıyl elimizden 14 komanda jáne kórshiles Ózbekstan men Qyrǵyzstannan kelgen komandalar qatysyp, beldesti.
Asa tartysty básekede jalpy 570-ke jýyq balýan baq synap, 9 salmaq dárejesi boıynsha ózara myqtyny anyqtady. Eki kúnge sozylǵan týrnır jeńimpazdary anyqtalyp, marapattaldy.
