Saıramda 700 tonnadan astam sút ónimderi shyǵaryldy - OQO
Tamaq ónerkásibi aýdannyń turaqty ekonomıkalyq damýynda asa mańyzdy oryn alady. Azyq-túlik ónimderiniń óndirisi óńdeý ónerkásibiniń eń qarqyndy damyp otyrǵan sektory bolyp tabylady.
Osyny eskergen Saıram aýdanynyń ákimdigi tamaq ónerkásibin damytý maqsatynda júıeli jumystar atqardy. Nátıjesinde 2017 jyldyń qańtar-shilde aılarynda 9 559,4 mln teńgege tamaq ónimderi óndirilgen. Bul ótken jyldyń tıisti kezeńimen salystyrǵanda ósim 18,2 paıyzdy quraǵan. Salada tabıǵı túrde 725 tonna sút ónimderi, 51 596 tonna un, 60 tonna shujyq ónimderi men 720,4 myń lıtr ózge de alkogolsiz sýsyndar óndirilgen.
Osyndaı tamaq ónerkásibi salasyndaǵy kásiporynnyń biri sút ónimderiniń birneshe túrin óndiretin 2007 jyly iske qosylǵan «Kompanııa Natýr Prodýkt» JShS. Kásiporyn búgingi tańda qarqyndy damý ústinde. Óndiriste «Han» saýda markasymen sút ónimderi: aıran, irimshik, ıogýrt, qurt, sary maı shyǵarylady.
Seriktestik Aqbulaq aýylynda ornalasqan. Táýligine 20 tonna sút óńdeýge qaýqarly óndiris orynda 32 jergilikti turǵyn turaqty jumyspen qamtylǵan. 2016 jyldyń qorytyndysymen óndiriste 108,2 mln teńgeniń ónimi óndirilip, bıýdjetke 19,2 mln teńge salyq tólegen. Al jeti aı ishinde 71 mln teńgeniń ónimi óndirilgen.
Kásiporynǵa «Agrobıznes 2020» memlekettik baǵdarlamasy aıasynda jyl saıyn sary maı men irimshikke sýbsıdııa bólinedi. Búgingi tańda kásiporyndy keńeıtý maqsatynda óndiris qýattylyǵyn arttyrý úshin táýligine 70 tonna sút óńdeıtin qural-jabdyqtar alynyp, montajdaý jumystary bastalǵan. Qosymsha bes jumys ornynyń ashylýy josparlanyp otyr.
Kásiporyn basshysy aldaǵy ýaqytta óndiristi keńeıtý maqsatynda Aqsý aýylynda táýligine 150 tonna sút óńdeıtin jańa zaýyt qurylysyn júrgizýdi josparlap otyr.
