Saıramda 70-ten asa mal bordaqylaý alańy ashyldy
ASTANA. QazAqparat - Túrkistan oblysynyń Saıram aýdanynda aýyl sharýashylyǵynyń bir tarmaǵy sanalatyn mal sharýashylyǵy qarqyndy túrde damyp keledi, dep habarlaıdy oblystyq ákimdiktiń baspasóz qyzmeti.
Salany damytýǵa arnalǵan memlekettik baǵdarlamalar men nesıelik jeńildikterdi utymdy paıdalanyp kele jatqan saıramdyq sharýalar mal bordaqylaý men sút saýý aýlalaryn kóptep ashyp, iske qosyp jatyr.
Máselen, jyl basynan beri aýdanda 73 birlik 10-15 bastyq shaǵyn mal bordaqylaý orny ashylǵan. Al, aýdandaǵy jalpy sany 913 mal bordaqylaý alańynda bir mezette 32-33 myń bas mal bordaqylanyp jatyr.
Jalpy, ótken jyldyń sáıkes kezeńimen salystyrǵanda Saıram aýdanynda iri qara mal basy 25,4 paıyzǵa, jylqy 14,3 paıyzǵa, qoı men eshki 19,3 paıyzǵa artqan. Olardan 2018 jyldyń basynan beri tiri salmaqta 15,895 myń tonna et, 75 myń tonna sút jáne 9,479 mln dana jumyrtqa óndirilgen.
Osylaısha, aýdannyń damý kontseptsııasynda aýyl sharýashylyǵy salasy boıynsha 2018 jylǵa josparlanǵan 6 jobanyń 4 jobasy iske asyp otyr.
