Saıramda 10 myń iri qara bordaqylanatyn keshen salynyp jatyr

TÚRKІSTAN. QazAqparat - Túrkistan oblysy Saıram aýdanynda bir mezette 10 myń iri qarany bordaqylaıtyn keshen salynýda. «Nurym Grýpp» jaýapkershiligi shekteýli seriktestiginiń mal bordaqylaý kesheninde qurama jem shyǵaratyn tseh jáne mal soıý alańy da qarastyrylǵan, dep habarlaıdy QazAqparat oblys ákiminiń baspasóz qyzmetine silteme jasap. 

Aýdanǵa arnaıy saparmen barǵan oblys ákimi J.Túımebaev atalǵan nysanǵa aıaldap, seriktestiktiń aldaǵy jumys josparymen tanysty.

Saıram aýdanynyń aýyl sharýashylyǵy salasy negizinen mal sharýashylyǵy men kókónis ósirýge baǵyttalǵanyn aıtqan aımaq basshysy bul keshen iske qosylsa, eldegi et eksporty artatynyn atap ótti.

«Aýdandaǵy aýyl sharýashylyǵy salasynda jyl basynan beri óndirilgen ónim kólemi 15 mlrd teńgeden asqan. Al, osy ýaqyt ishinde 11 myń tonna shamasynda et, 51 myń tonna sút, 7 mln dana jumyrtqa óndirilgen. Qurylys jumystary júrgizilip jatqan keshen aýdandaǵy eń iri mal bordaqylaý alańynyń biri bolyp otyr. Osy qarqynmen jumysty jalǵastyra otyryp, óńdeý ónerkásibine kóńil bólip, maldy tirideı satýdan bólek onyń etin tereń óńdep satý máselesin de qolǵa alý qajet», - dedi oblys ákimi.

Al, keshenniń qurylysymen tanystyrǵan kásipker S.Ertaev keshendi iske qosqanda et eksporty kólemi artatynyn aıtty.

  «Qyrkúıek aıynda mal bordaqylaý jumysyn bastaımyz. Jumys jospar boıynsha júrgende kúnine 100 bas sıyrdyń etin óndirýge qol jetkizemiz. Qazirgi tańda, et eksportaýǵa qatysty Iran jáne Ózbekstan elderimen kelisim-shart túzildi. Bizdiń ónimderge degen suranys óte joǵary. Ázirge tipti úlgere almaı jatyrmyz dep aıtýǵa bolady. Máselen, jyl basynan beri Ózbekstanǵa jalpy 800 tonna, Iranǵa 200 tonna et jóneltildi», - dedi kásipker.

Joba quny 3,456 mlrd teńgeni quraıdy. 80 adam jumyspen qamtylyp otyrǵan keshende jylyna 5000 tonna et óndiriledi.

Aıta keteıik, jalpy aýdanda 300 bastan joǵary iri qara bordaqylaıtyn 33 alań bar. Al, jalpy mal bordaqylaý alańdarynyń sany 900-ge jýyqtaıdy.

Sondaı-aq, óńir basshysy aýdanǵa sapary barysynda shet elderden kelgen eriktilermen kezdesip, jumysshy toptyń atqaryp jatqan jumysymen tanysty. Sonymen qatar, eriktilerge alǵys bildirgen oblys ákimi toptyń birqatar múshelerin marapattady.

Quramynda dáriger, qurylysshy syndy túrli salanyń mamany bar eriktiler tobynyń Saıram aýdanyna kelgenine 3 aptanyń júzi bolǵan. Olar munda áleýmettik az qamtylǵan otbasylarǵa túrli baǵytta aqysyz kómek kórsetýmen aınalysyp keledi. Sheteldik qaıyrymdy jandar elimizde taǵy 2,5 aıǵa deıin bolyp, muqtaj jandarǵa qol ushyn sozýdy josparlap otyr.