Saıramda 1 myń otbasy kógildir otynǵa qol jetkizdi
ShYMKENT. QazAqparat - Ońtústik Qazaqstan oblysy Saıram aýdany Qarabulaq eldi mekenine tabıǵaı gaz jetkizilip, ony naqty 1 myńǵa jýyq otbasy paıdalanyp otyr, dep habarlaıdy oblystyq ákimdiktiń baspasóz qyzmeti.
Qazirgi ýaqytta Qarabulaqtaǵy 7 438 abonenttiń, ıaǵnı 43 myńnan astam turǵynnyń tabıǵı gazǵa qosylýy úshin tehnıkalyq sharttar jasalyp, qujattary rásimdelýde.
Kósheishilik gaz qubyryn júrgizý qurylysynyń aıaqtalý saltanatyna oblys ákimi Janseıit Túımebaev pen «QazTransGaz Aımaq» AQ Ońtústik Qazaqstan óndiristik fılıaly dırektorynyń birinshi orynbasary Asqar Máýkenov, jergilikti turǵyndar men BAQ ókilderi qatysty.
Turǵyndardyń qýanyshymen bólise kelgen aımaq basshysy, bul jetistiktiń egemendi elimizdiń árbir jyly qalyptasý, tolysý, ósip-órkendeý jyldarynda múmkin bolyp otyrǵanyn aıtty.
«Egemendigimizdiń shırek ǵasyrynda el ıgiligi úshin kóptegen ister atqaryldy. Alaqandaı aýyldarda zaman talabyna saı mektepter men balabaqshalar, medıtsınalyq mekemeler salyndy. Qanshama shaqyrymdardy quraıtyn ishki joldar jóndeldi. Óńirimizdiń kóptegen eldi mekenderi taza sýmen qamtylyp, turǵyndar tabıǵı gazǵa qol jetkizýde. Sonyń bir aıǵaǵy - búgin ózderińizben birge 43 myńnan astam adamdy tabıǵı gazben qamtıtyn kósheishilik gaz qubyryn saltanatty túrde iske qosyp otyrmyz», - dedi ákim.
Atalǵan eldi mekendi tabıǵı gazben qamtamasyz etý jumystary 2013 jyly bastalǵan bolatyn. Jobalaý-smetalyq qujattamaǵa sáıkes, osy merzim ishinde 315,5 shaqyrym gaz qubyrlary júrgizilip, 3719 ShGTP (shkaftyq gaz taratý pýnkti) ornatyldy. Eldi mekendi tabıǵı otynǵa qosý jumystaryna oblystyq bıýdjetten 2 mlrd. teńgeden astam qarajat bólingen. 
Jalpy, Saıram aýdanynda 42 eldi meken bolsa, ondaǵy jergilikti halyqtyń sany 203 myńnan astam adamdy quraıdy. Búgin el ıgiligine berilip otyrǵan Qarabulaq aýylyn qosa eseptegende, aýdandaǵy kógildir otynǵa qol jetkizgen eldi mekender sany 19-ǵa (munda 158 688 adam ómir súredi) jetip, tabıǵı gazben qamtylý deńgeıi 78 paıyzǵa jetip otyr.
Aldaǵy ýaqytta qurylysy aıaqtalǵan «Beıneý-Bozaı-Shymkent» magıstraldik gaz qubyryna №20 «Jańaqoǵam» AGTS arqyly Saıram aýdanyndaǵy qalǵan 23 eldi meken qosylyp, jospar boıynsha 2020 jylǵa deıin tolyq tabıǵı gazben qamtamasyz etý kózdelýde. 
