Saıram turǵyny polıtseıdi kapotymen súırep, basqa mashınany baryp soqqan
AQSÝKENT. QazAqparat - Ýchaskelik polıtsııa ınspektory óz ómirin qaterge tigip, jol-qozǵalysy erejesin buzǵan kólikti toqtatty, dep habarlaıdy QazAqparat oblystyq polıtsııa departamentine silteme jasap.
Aqsýkent aýyly kósheleriniń birinde túngi patrýl kezinde Saıram APB JPQ polıtsııa qyzmetkerleri kúdik týǵyzǵan «VAZ» avtokóligin baıqady. Tártip saqshysy júrgizýshige toqtaýdy kórsetti, biraq ol zańdy talaptarǵa baǵynbaı, jasyrynýǵa tyrysty.
Osy kezde ýchaskelik ınspektor Dáýren Baıharashev tártip buzýshynyń jolyn japty. Alaıda, júrgizýshi baǵynbaı, qozǵalysyn jalǵastyryp, polıtseıdi soqty. Biraq Dáýren kapotqa sekirip úlgerdi.
Tártip buzýshy maıor Baıharashevty kóliktiń ústinen túsirýge tyrysyp, qatty jyldamdyqpen aýyl kóshelerimen júredi. Óziniń kásibıligi men dene daıyndyǵynyń arqasynda polıtseı kapottan myqtap ustap tura aldy. Osy kezde ýchaskelik ınspektordyń áriptesteri júrgizýshiniń izine túsip, tártip buzýshyny qýa jóneldi.
Sondaı-aq, onyń ustalýyna «Aýdı» júrgizýshisi kómek kórsetti. Ol óziniń azamattyq boryshyn oryndaı otyryp, avtokólikti toqtatýǵa tyrysty. Osyǵan qaramastan VAZ júrgizýshisi jyldamdyqty tómendetpeı aýyl turǵynynyń kóligin soqty.
Sodan keıin polıtsııa qyzmetkerin kapotpen súıreı otyryp, Almaty-Termez tasjolyna shyǵyp, kórshi Qarabulaq aýylyna jetpeı avtokóligin tastap, qashyp ketken. Ýchaskelik polıtsııa ınspektory Dáýren Baıharashevqa alǵashqy medıtsınalyq kómek kórsetildi.
Saıram APB polıtsııa qyzmetkerleri jedel-izdestirý is-sharalary barysynda kúdikti retinde jergilikti turǵyndy quryqtady. Ol óz kinásin tolyq moıyndady.
Bul jaıt QR QK 380-baby 2-bóligi «Bılik ókiline qatysty kúsh qoldaný» boıynsha tirkeldi. Saraptama taǵaıyndaldy. Atalǵan jaıt boıynsha sotqa deıingi tergeý amaldary júrgizilýde. Qazirgi ýaqytta tergeý oqıǵanyń tolyq mán-jaıyn anyqtaýda.
Óz kezeginde, Saıram APB-nyń jergilikti polıtsııa qyzmetiniń ýchaskelik polıtsııa ınspektory polıtsııa maıory Dáýren Baıharashev qyzmet kórsetiletin ákimshilik ýchaskede qoǵamdyq tártip pen azamattardyń qaýipsizdigin qamtamasyz etý boıynsha qyzmetin jalǵastyrýda.
Túrkistan oblysynyń polıtseıleri azamattardy jol qozǵalysy erejelerin saqtaýǵa shaqyrady. Jyldamdyqty asyrmańyz, manevr jasaý erejelerin buzbańyz jáne qarsy qozǵalys jolaǵyna shyqpańyz, sondaı-aq bılik ókilderiniń zańdy talaptaryna baǵynyńyz.
