Saıram-Ógem parkinde Qyzyl kitapqa engen Tıan-Shan qońyr aıýy fototuzaqqa túsip qaldy
ASTANA. KAZINFORM — Fototuzaqtarǵa Qazaqstannyń Qyzyl kitabyna engen, tabıǵatta sırek kezdesetin jabaıy janýarlar túsip qaldy. Bul týraly Orman sharýashylyǵy jáne janýarlar dúnıesi komıteti málim etti.
— Saıram-Ógem memlekettik ulttyq tabıǵı parkiniń aýmaǵynda júrgizilip jatqan keshendi qorǵaý sharalary óz jemisin berýde. Sońǵy jyldary ulttyq park qyzmetkerleriniń jiti qadaǵalaýy men tabıǵatty udaıy baqylaýy nátıjesinde jabaıy janýarlar dúnıesiniń aıtarlyqtaı ósimi baıqalyp otyr, — delingen habarlamada.
Ekologııalyq monıtorıng derekterine sáıkes, qar barysy, Tıan-Shan qońyr aıýy, Qarataý arqary jáne ózge de sırek kezdesetin ańdardyń sany jyldan-jylǵa turaqty túrde artyp keledi.
Mundaı oń ózgerister eń aldymen ormanshylar men ınspektorlardyń tynymsyz eńbeginiń arqasy. Olar zańsyz ańshylyqtyń aldyn alý, janýarlardyń meken etý ortasyn saqtaý, sondaı-aq tabıǵı tepe-teńdikti qorǵaý baǵytynda júıeli jumys júrgizilip keledi.
Eske sala keteıik, buǵan deıin Іle-Balqash rezervatynda Qyzyl kitapqa engen qulandar fototuzaqqa túsip qalǵan edi.