Saıram-Ógem memlekettik ulttyq tabıǵı parkinde tazalyq aktsııasy ótti

Ekologııa, geologııa jáne tabıǵı resýrstar mınıstrliginiń bastamasymen #Birge#TazaQazaqstan ekologııalyq sharasy elimizdiń barlyq erekshe qorǵalatyn tabıǵı aýmaqtarynda uıymdastyrylǵan bolatyn, dep habarlaıdy QazAqparat tilshisi.

Aktsııaǵa Saıram-Ógem memlekettik ulttyq tabıǵı parkiniń qyzmetkerleri men Tólebı aýdany ákimdigi men máslıhatynyń, «Nur Otan» partııasy ardagerler keńesiniń jáne basqa da qoǵamdyq uıymdar ókilderi, jergilikti kásipkerler men bank qyzmetkerleri, ekologııalyq uıymdardyń ókilderi qatysty.

Ekologııalyq shara aıasynda ózenderdiń arnasy, týrıstik marshrýttar, Saıramsý shatqalyndaǵy jol boıy men ózen jaǵalaýy jáne 8 demalys alańqaılary tazalandy. Sondaı-aq, kordon-demalys úıleriniń aýlasy men ótkizý-tazalaý beketiniń tóńirekteri jáne basqa da tabıǵı oryndardy retke keltirý men abattandyrý jumystary uıymdastyryldy.

«Saıram-Ógem» memlekettik ulttyq tabıǵı parkiniń bas dırektory Sahıt Qyntaev atalǵan ekologııalyq aktsııa azamattardy Qazaqstannyń florasy men faýnasyn saqtaýǵa jáne ekologııalyq mádenıetiniń damýyna septigin tıgizetinin atap ótti.