Saıram aýdanynyń turǵyny jıhadqa shaqyrǵan úshin sotqa tartyldy

ASTANA. QazAqparat - Ońtústik Qazaqstan oblysy Saıram aýdandyq sotynda áleýmettik jeli arqyly terrorızmdi nasıhattaǵan 27 jastaǵy jigittiń isine qatysty alǵashqy sot otyrysy bolyp ótti, dep habarlaıdy «QazAqparat» HAA tilshisi vk-uko aqparat kózine silteme jasap.

Tergeý barysynda jas jigittiń arab elderine bolyp, óz jaǵyna tartqan adamdarmen birge Sırııada soǵyspaqqa árekettengeni anyqtalǵan. Birneshe jyl boıy 27 jastaǵy Ábilqasym óziniń VKontakte paraqshasy arqyly Taıaý Shyǵys pen Sırııada soǵysyp júrgen ekstremıstik toptardy qoldaýǵa  jáne qasıetti soǵysqa qatysýǵa shaqyrǵan. Sottalýshy óziniń uıaly telefony arqyly áleýmettik jelige kirip júrgen. Telefonnyń nómiri arqyly ustalǵan.

«QR Qylmystyq kodeksine sáıkes, ol 256-bap 1-bóliginde qarastyrylǵan (terrorızmdi nasıhattaý) qylmysty jasaǵan», - deıdi Ál-Farabı aýdany prokýratýrasy prokýrorynyń orynbasary Nurlan Mahadılov.

Sottalýshynyń osy ýaqytqa deıin Saýd Arabııasy men Reseıge shyǵyp, DAISh sapyna enýdi josparlaǵany belgili bolyp otyr. Qazirgi ýaqytta onyń artynda tórt balasy men aıaǵy aýyr áıeli qalǵan.

«Odan barlyq kúdikti zattar tárkilendi. Aıyptan jaltaryp otyrǵan joq. Onyń ákesi de bir jyldan keıin túrmeden shyǵady. Ol da terrorızmge shaqyrǵany úshin sottalǵan. Terrorızmdi nasıhattaý toqtaıtyn emes», - deıdi Saıram aýdandyq sotynyń sýdıasy Saltanat Qabylova.

Aıta keterligi, bul is Saıram aýdandyq sotynda ótip jatqan dinı ekstremızmge qatysty isterdiń alǵashqysy emes. Osy jyldyń sáýir aıynda dál osy sotta Qazaqstanda tyıym salynǵan «Tablıǵı jamaǵat» uıymynyń 7 múshesi sottalǵan bolatyn.