Saıram aýdanynyń 90 jyldyq merekesi atalyp ótti
TÚRKІSTAN. QazAqparat - Búgin Túrkistan oblysynda Saıram aýdanynyń 90 jyldyǵyna oraı merekelik kesh uıymdastyryldy. Saltanatty shara Aqsýkent eldi mekenindegi Mádenıet úıinde bastaý aldy, dep habarlaıdy óńir basshysynyń baspasóz qyzmeti.
Jıynǵa arnaıy qatysqan aımaq basshysy Janseıit Túımebaev turǵyndar men qonaqtardy atalǵan merekemen quttyqtap, aýdannyń ósip-órkendeýine súbeli úles qosqan birqatar azamattardy marapattady.
«Sizderdi aýdannyń 90 jyldyq mereıtoıymen shyn júrekten quttyqtaımyn! Saıram - Túrkistan oblysyndaǵy iri aýdandardyń biri sanalady. Aýdannyń óńirimizdegi óndiristik-ekonomıkalyq áleýeti joǵary deýge tolyq negiz bar. Halqymyz úshin Saıramnyń orny bólek. Yqylym zamannan beri ata-babalarymyz qonys etken qutty ólkede el tarıhyndaǵy eleýli oqıǵalar ótti. Mártóbede keleli keńester uıymdastyrylyp turǵan. Osy keńeste qazaqtyń qaıratkerleri men bıleri, kósemderi men sheshenderi ult taǵdyryna oń áser etetin bátýaly sheshimder qabyldaǵan. Qazaqtyń kóne qalasy Saıram týraly álem ǵalymdary men tarıhshylary oı qozǵaǵan. Ataqty Mahmut Qashqarıdyń eńbekterinde de Saıram jaıly aıtylady. Orta ǵasyrlarda qolóner men saýda ortalyǵy retinde tanylǵan Saıram búgin de óz bıiginen túsken joq. Aýyl sharýashylyǵyna beıimdelgen aýdan qaıta ýaqyt ótken saıyn órkendep ósip keledi. Atalmysh salada jalpy ónim kólemi 1991 jyly 1 mlrd 227 mln. teńgeni qurasa, 2017 jyly 58 mlrd teńgege jetken. 26 jyldyń ishinde 46 esege artyp otyr. Al, Táýelsizdiktiń alǵashqy jylynda 7422 tonna et óndirilse, byltyr bul kórsetkish 26 660 tonnaǵa jetken. Aýdannyń aýylsharýashylyq salasyn damytýǵa respýblıkalyq bıýdjetten 636,8 mln sýbsıdııa berilgen. Ekonomıka damýynyń kórsetkishi sanalatyn shaǵyn jáne orta kásipkerlik salasy Saıram aýdanynda jaqsy damyǵan. 27 jyl buryn shaǵyn jáne orta kásipkerlik sýbektileriniń sany 3000-nan sál ǵana assa, ótken jylǵy esep boıynsha 13 myńnan asyp tústi. Olardyń óndirip jatqan ónimderi de qomaqty», - dedi Janseıit Qanseıituly.
Merekelik jıyn Dendrosaıabaqta jalǵasyn tapty. Onda qonaqtar aǵash kóshetterin otyrǵyzdy. Ónerpazdar qasıetti ólke jaıynda sahnalyq qoıylymdar qoıyp, patrıottyq ánder oryndady. Sondaı-aq, qonaqtar «Qurmetti azamattar» alleıasymen, «Máńgilik el» monýmentimen tanysyp, arnaıy uıymdastyrylǵan kórme - jármeńkeni tamashalady.
