Saıram aýdanynda toıhana ǵımaraty gemodıalız ortalyǵyna aınaldy
SAIRAM. QazAqparat - Túrkistan oblysy, Saıram aýdanynda tuńǵysh ret gemodıalız ortalyǵy ashyldy. Bul - memlekettik-jekeshelik seriktestik aıasynda júzege asqan joba sanalady, dep habarlaıdy QazAqparat tilshisi.
Toıhana ǵımaratynda zamanaýı úlgide jabdyqtalǵan medıtsınalyq ortalyq ashqan jergilikti kásipker 120 mln teńge jeke qarajatyn jumsaǵan. Endigi jerde sozylmaly búırek aýrýyna shaldyqqan 80 naýqas jol azabyn tartpaı, jaqyn mańnan em alady. Dıalız zaly eń ozyq medıtsınalyq qondyrǵylarmen tolyqqan.
Saıram aýdanynda saparmen barǵan oblys ákimi Ómirzaq Shókeev «Med Alataý» ortalyǵynyń jumysymen de tanysty. Qarabulaq aýyl okrýgindegi «Ulyqbek» sharýa qojalyǵynda bolyp, dıqandarmen kezdesti.
Sý jınaý munarasyn jasaý jumystarymen tanysty. Sondaı-aq Aqsýkent aýyl okrýgindegi sý men tabıǵı gazǵa arnalǵan qubyr «Ońtústik Qazaqstan polımer qubyrlary zaýytyn» aralady. Zaýyt qýattylyǵy jylyna 10 myń tonnany quraıdy.
«Bıznestiń jol kartasy – 2020» baǵdarlamasy aıasynda memleketten qoldaý kórgen óndiris orny búginde tolyǵymen ózin-ózi qarjylandyryp, 33 adamdy jumyspen qamtyp otyr. Ónimi ishki naryqta saýdalanady.
Jumys sapary barysynda oblys ákimi Aqsýkent aýyl okrýgindegi «Sairam Thermal Resort» emdeý saýyqtyrý keshenine bardy. Jobanyń quny – 500 mln. teńge. Munda jylyna 3 myńnan astam adam em qabyldaıdy. Saıramdyq sanatorıı pandemııa kezinde dertke shaldyǵyp, qaıta saýyqqan naýqastardyń organızmin qaıta qalpyna keltirý úshin arnaıy emdik-saýyqtyrý baǵdarlamasyn ázirlegen. Kelýshiler negizinen mıneraldy qospasy bar termııalyq mıneraldy sýmen emdeledi.
