Saıram aýdanynda qosymsha ınfektsııalyq statsıonar salynady
AQSÝKENT. QazAqparat – Koronavırýs ınfektsııasymen kúres maqsatynda Túrkistan oblysy Saıram aýdanynda qosymsha 100 tósek-oryndyq ınfektsııalyq statsıonar salynady. Óńir basshysy Ómirzaq Shókeevtiń bastamasymen júzege asatyn jobanyń jer telimi bekitildi, dep habarlaıdy QazAqparat tilshisi.
Atalǵan aýdanǵa sapary barysynda oblys ákimi Saıram aýdandyq ortalyq aýrýhanasynyń indettiń ekinshi tolqynyna daıyndyq barysyn baqylady.
Medıtsınalyq mekemeniń 7 bólimshesinde kúrdeli jóndeý júrgizilgen. Emdeý mekemesi 134 myńnan astam halyqqa qyzmet kórsetedi.
«Іndettiń beleń alý qaýpi baryn bile, ár adam jaýapkershiligin túsingen durys. Vırýstyń ekinshi tolqynyna tótep berý úshin oblys aýmaǵynda jumystar kúsheıtildi. Medıtsına qyzmetkeleri qorǵanysh quraldarymen jáne zalalsyzdandyrý zattary jáne dári-dármek qorymen tolyq qamtamasyz etilýi tıis. Al aýdandyq aýrýhanalarda júrip jatqan kúrdeli jóndeýdiń sapasy qatań baqylaýda bolsyn»,-dedi oblys ákimi.
Búginde aýrýhanada 40 orynǵa eseptelgen ınfektsııalyq bólim jasaqtalǵan. Sondaı-aq, COVID-19 dıagnostıkalyq medıtsınalyq qural-jabdyqtar tolyq jınaqtalǵan.
Ambýlatorlyq-emhanalyq uıymdarda 28 mobıldi top qurylyp, 4500-den astam naýqasty emdegen.
Emdeý mekemesi ÓJJ apparattary jáne ottegi kontsentratorymen qamtamasyz etilgen.
Aımaq basshysy jumys sapary barysynda Aqsýkent aýyldyq okrýgindegi medıtsınalyq maska shyǵaratyn «S Medical» JShS jumysymen tanysty.
Taıaýda ashylǵan óndiris ornynda táýligine 80 myń, aıyna 2 mln dana medıtsınalyq maska shyǵarylýda.
