Saıram aýdanynda kásipker toıhanasyn sport nysanyna aınaldyrdy
TÚRKІSTAN. QazAqparat – Túrkistan oblysynda karantın kezinde buryn toıhana bıznesimen aınalasatyn kásipkerler arasynda isin jańa baǵytqa burǵandar artty. Saıram aýdanyndaǵy jergilikti kásipkeri Ómirhan Orazymbetov úshin de bıznestegi baǵytyn ózgertýge pandemııa sep boldy, dep habarlaıdy QazAqparat tilshisi.
Ótken jyly toıhana salǵan bıznesmenniń jańa ǵımaraty búkil álemdi jaılaǵan pandemııaǵa baılanysty bos turǵan. Qazir «Dostyq» sport mektebinde 200 bala sporttyń bes túri boıynsha tegin jattyǵady. Munda taekvondo, dzıýdo, sambo, karate jáne gımnastıka úıirmeleri jumys isteıdi. Segiz bilikti bapker balalardy sportqa baýlıdy. Sport zaldyń ishi zaman talabyna saı jasaqtalǵan. Ekinshi qabatynda eresekterge arnalǵan zaly jumys isteıdi. Saıram aýdanynyń sport bólimi mamandarynyń málimetinshe, salaýatty ómir saltyn ustanatyn aýyl jastary bos ýaqytyn osynda ótkizedi.
