Saıram aýdanynda qaraqshylar janarmaı beketin 40 sekýnd ishinde tonap ketken
SAIRAM. QazAqparat – Túrkistan oblysynda Krımınaldyq polıtsııa basqarmasy qyzmetkerleri janarmaı beketine qaraqshylyq shabýyl jasaǵandardyń birin ustady. Tergeý barysynda kúdiktiniń Saıram aýdanynda aýyr qylmys jasaǵany dáleldenip otyr, dep habarlaıdy QazAqparat tilshisi.
Oblystyq PD baspasóz qyzmetiniń málimetinshe, aǵymdaǵy jyldyń qazan aıy ortasynda janarmaı beketteriniń birine shabýyl jasalǵan. Bul týraly Saıram aýdanyndyq polıtsııa bólimine tańǵy 5:45 shamasynda shuǵyl habarlama kelip túsken. Osydan keıin Krımınaldyq polıtsııa basqarmasy qyzmetkerleri men Saıram aýdandyq tártip saqshylary qylmysty ashýǵa kirisken. Belgili bolǵandaı, janarmaı beketine belgisiz eki tulǵa basa kóktep kirip, nebári 40 sekýnd ishinde qaraqshylyq shabýyl áreketin jasaǵan. Olardyń biriniń qolynda qosaýyz myltyq, al ekinshisiniń qolynda gaz ballony bolǵan. Osylaısha kúdiktilerdiń biri operatordyń betine gaz ballondy shashyp, kúzetshige myltyq kezegen. Ekinshisi kassır qyzdy qorqytyp, kassadaǵy 166 myń teńgeni jymqyryp ketken. Qaraqshylar beket mańynda kólikte tosyp turǵan úshinshi sybaılasymen birge boı tasalap úlgergen.
«Jedel izdestirý sharalarynyń barysynda polıtseıler osy qylmysqa qatysy bar degen kúdiktiniń birin qolǵa túsirdi. Polıtseıler atalǵan jaıtty QR Qylmystyq kodeksiniń 192-baby «Qaraqshylyq» boıynsha tirkeýge alyp, sotqa deıingi tergep-tekserý amaldaryn júrgizýde» delingen habarlamada.
Oblystyq Polıtsııa departamenti Krımınaldyq polıtsııa basqarmasynyń bastyǵy, polıtsııa podpolkovnıgi Qurmanbek Sahovtyń aıtýynsha kúdiktiler qylmystaryn aldyn ala josparlaý arqyly jasaǵan.
«Qylmys tań sáride bolǵandyqtan, kórgen bilgen kýágerler joq. Oǵan qosa kúdiktiler jedel qımyldap, qylmystaryn nebári 40 sekýnd ishinde istep úlgergen. Biz olardyń áreketterin topshylaı kele, aldyn ala sóz baılasyp, jospar boıynsha isteýleri de múmkin dep boljadyq. Sondyqtan búgingi tańda bizdiń jedel ýákilder qylmyskerlerdi ustaýdyń túrli joldaryn iske asyrýda. Qylmysty ashý barysynda úsh kúdiktiniń de jergilikti turǵyn ekeni jáne biriniń buryn sońdy sotty bolǵandyǵyn anyqtadyq. Іzdestirý men tergeý amaldaryn odan ári qaraı jalǵastyra beretin bolamyz», - deıdi TO PD Krımınaldyq polıtsııa basqarmasynyń bastyǵy, polıtsııa podpolkovnıgi Qurmanbek Sahov.
