Saıram aýdanynda aýyl ákimdiginiń keńsesi «Adaldyq alańyna» aınaldy
Ózi ǵımarattyń birinshi qabatyndaǵy azamattardy jeke ótinishterimen qabyldaıtyn mamandarmen birge bir kabınetke jaıǵasty, dep habarlaıdy QazAqparat tilshisi.
QR Prezıdentiniń «Halyq únine qulaq asatyn memleket» tujyrymdamasyn júıeli túrde jolǵa qoıǵan aýyl ákimi M.Najıevtiń aıtýynsha, turǵyndarmen baılanysýdyń bul ádisi – «Adaldyq alańy» retinde jemqorlyqtyń oryn alýyna jol bermeıdi. Tuǵyndar munda QR Elektrondy úkimet qyzmetin paıdalana alady. Aryz-shaǵym men usynys-tilekterdi sondaǵy mamandar qaraıdy. Ári aýyl ákimi qolastyndaǵy qyzmetkerlerdiń halyqpen etene jaqyn aralasyp, tájirıbe almasýyna tıimdi bolmaq. Bul úrdisti Saıram aýdanynyń ákimi Ulasbek Sádibekov basqa aýyl okrýgterine azamattyq qoǵamdy damytýdyń úlgisi retinde atap ótti.
«Ár aýyl okrýginiń ákimi Qaramurttaǵy ádispen jumys istep, el ishindegi ózekti máselerdiń sheshimin tabýǵa jumylýy qajet. Aýyl ákimderi qyzmetkerleriniń ortasynda júrip, kez kelgen aýyl turǵyny erkin sóılese alatyndaı jaǵdaı jasasa, naǵyz «Ashyq ákimdikke» aınalady», - dedi aýdan basshysy.
