Saıram aýdanynda 103 jastaǵy keıýana daýys berdi

TÚRKІSTAN. QazAqparat - Túrkistan oblysyndaǵy densaýlyǵyna baılanysty úıinde otyrǵan ardagerler men zeınetkerlerdiń de daýys berýine jaǵdaı jasalýda. Saılaý komıssııasynyń músheleri osyndaı azamattardyń úıine baryp, óz tańdaýlaryn jasaýyn qamtamasyz etýde, dep habarlaıdy QazAqparat tilshisi.

Saıram aýdanyna qarasty Qaramurt aýylynda turatyn 103 jastaǵy qart ana Totyaı Tólegenova da búgin saılaýǵa bir kisideı daýys berdi. Ekinshi dúnıejúzilik soǵystyń ardageri sanalatyn ájeıdiń 5 uly bar. Sondaı-aq, 17 nemere men 54 shóbereniń ájesi atanyp otyr. Óz kezeginde úıine kelip, tańdaý jasaýǵa kómek kórsetken komıssııa múshelerine zeınetker alǵysyn bildirip, aq batasyn berdi.

Aıta keteıik, atalǵan aýdan turǵyndary saılaý naýqanynda erekshe belsendilik tanytyp otyr. Al, saılaý ýchaskesine alǵashqy bolyp kelgen 5 saılaýshyǵa arnaıy syılyqtar tapsyrylǵan bolatyn. Mundaı qurmet saılaýǵa alǵash ret qatysqan eń jas turǵynǵa da kórsetildi. Jalpy Saıram aýdanynda úsh aýyldyq okrýgtegi 12 saılaý ýchaskesinde daýys berý protsesi júrip jatyr.