Saıram aýdanynda 8 adam bóten úıge basyp kirip, búkil otbasyn soqqyǵa jyqqan

TÚRKІSTAN. KAZINFORM - Kórshiler arasyndaǵy janjaldan keıin qylmystyq is qozǵaldy.

Áleýmettik jelidegi aqparatqa súıensek, Saıram aýdanynda shamamen segiz adam bóten úıge basa-kóktep kirip, búkil otbasyn aıaýsyz soqqyǵa jyqqan. Jábirlenýshilerdi basqa turǵyndar qutqaryp qalǵan. 

Beınematerıalda sóılegen er adamnyń aıtýynsha, oqıǵa shamamen bir saǵatqa sozylyp, ózi, anasy, ákesi jáne dosy jaraqat alǵan. 

- Meniń qolym syndy, ákemniń basy jaryldy. Anam áli kúnge deıin qaltyrap otyr. Bizge áli kúnge deıin tynyshtyq bermeı jatyr, – deıdi jábirlenýshi.

Onyń sózinshe, aýrýhanaǵa barǵan kezde de qarsy tarap ókilderi kelip, aıqaı-shý shyǵarǵan.

Túrkistan oblysy polıtsııa departamentiniń baspasóz qyzmeti atalǵan jaǵdaıǵa qatysty dene jaraqatyn keltirý faktisi boıynsha qylmystyq is qozǵalǵanyn jetkizdi. 

- Oqıǵaǵa qatysy bar barlyq adamdar polıtsııaǵa jetkizilip, jaýap alyndy. Tergeý barysynda kórshiler arasyndaǵy janjaldyń turmystyq sebepten týyndaǵany anyqtaldy.Qazirgi ýaqytta taraptardyń ýájderi zerttelip, barlyq mán-jaılardy anyqtaýǵa baǵyttalǵan qajetti is-sharalar júrgizilýde. Tergeý nátıjesi boıynsha olardyń áreketterine quqyqtyq baǵa berilip, is materıaldary sotqa joldanatyn bolady. Tergeý múddesine baılanysty ózge málimetter QR QPK-niń 201-babyna sáıkes jarııa etýge jatpaıdy, - delingen vedomstva aqparatynda. 

Aıta keteıik, budan buryn Túrkistan oblysynda dárilik shóp jınaýmen aınalysqan 100-den astam sheteldik anyqtalǵanyn jazǵan bolatynbyz.