Saılaýshylarǵa syılyq úlestirýge bıýdjetten aqsha qarastyrylmaǵan – komıssııa

ALMATY. QazAqparat - Almatyda keıbir referendým ýchaskelerinde alǵashqy saılaýshylarǵa syılyq berildi. Bul týraly aýmaqtyq komıssııa tóraǵasy Janna Asanova aıtty, dep habarlaıdy QazAqparat tilshisi.

Spıker brıfıng barysynda referendým ýchaskesindegi komıssııa músheleri saılaýshylarǵa syılyqty qaıdan aldy degen saýalǵa jaýap berdi.

«Syılyqqa respýblıkalyq jáne jergilikti bıýdjetten qarajat bólingen joq. Ereje boıynsha saılaý ýchaskelerinde kádesyılar, fırmalyq shynyaıaq taratyldy. Ýchaskelik komıssııalar mundaı zattarmen qamtamasyz etilmegen. Muny kásipkerler demeýshi retinde, jeke uıymdar óz ónimderin jarnamalap usynýy múmkin. Bul oń úrdis keńes kezeńinen beri jalǵasyp keledi, ásirese kóptegen jastar úshin alǵashqy saılaý mereke ispettes. Almatynyń keıbir ýchaskelerinde syılyq bolǵanyn atap ótkim keledi», - dedi Janna Asanova.

Aıta keteıik, búǵan deıin táýelsiz baqylaýshy Marııa Lobacheva óziniń Facebook paraqshasynda referendýmǵa qatysqan alǵashqy daýys berýshilerge shapan, sháınek, krýjkalar, saǵat pen táttiler syıǵa tartylǵanyn aıtty.