Saılaýshylardyń jaýapty tańdaý jasaýy óte mańyzdy - sarapshy

NUR-SULTAN. QazAqparat - Ál-Farabı atyndaǵy QazUÝ Saıasattaný jáne saıası tehnologııalar kafedrasynyń meńgerýshisi, professor Gúlnár Nasımova elimizdegi saılaý aldyndaǵy jaǵdaıǵa baılanysty pikir bildirdi, dep habarlaıdy QazAqparat tilshisi.

«Qazirgi kezde QR Prezıdenti laýazymyna kandıdattardy usyný protsesi júrip jatyr. Osydan keıin úmitkerlerdiń QR Konstıtýtsııasyna jáne «Saılaý týraly» Zań talaptaryna sáıkestigi anyqtalady. Sonymen qatar eń qyzyqty kezeń - ol saılaý aldyndaǵy úgit-nasıhat. Bul naýqanda QR Ortalyq saılaý komıssııasynyń óz qyzmetin qalaı atqaratyndyǵy da asa mańyzdy», - dep toqtaldy ǵalym.

Osy oraıda ol birinshi kezekte saılaýdy ádil ári ashyq ótkizýge erekshe ekpin qoıylatynyn atap ótti.

«Azamattardyń saılaýdaǵy is-qımyly da mańyzdy faktor bolyp sanalady. Qazaqstandyq elektorat kandıdattardyń usynǵan baǵdarlamalaryna nazar aýdaratyny belgili. ıAǵnı el halqy áleýmettik-ekonomıkalyq blokqa qatysty aıryqsha mán beredi. Óıtkeni materıaldyq-ekonomıkalyq ál-aýqattyń artýy máselesi kópshiliktiń nazarynda», - dedi G. Nasımova.

Sarapshynyń paıymynsha, osyǵan baılanysty azamattardyń elektoraldyq qatysýy deńgeıi anyqtalady.

«Sonymen birge, saılaýshylar tańdaýy kóbine kandıdattardyń áleýmettik-ekonomıkalyq baǵdarlamalardy júzege asyrýdyń qandaı naqty tetikterin usyna alýyna baılanysty bolady. Eń bastysy, elektorat saılaý quqyq buzýshylyqsyz ótetinine, sondaı-aq saılaýshylar daýysy eldiń ary qaraı damýyn aıqyndaıtynyna senimdi bolýy kerek. Bizdiń saılaýshylardyń ońtaıly ári jaýapty tańdaý jasaýy óte mańyzdy», - dedi ǵalym.