Saılaýshylardyń belsendiligi jaǵynan Almaty oblysy kósh bastap tur - OSK
ASTANA. 15 qańtar. QazAqparat /Aıdar Ospanalıev/ - Búgin, saǵat 14.00-degi málimetter boıynsha, Májilis pen máslıhat depýtattary úshin eń kóp daýys bergen aımaq Almaty oblysy bolyp otyr. Oblysta turǵyndardyń 74,1 paıyzy óz tańdaýlaryn jasap úlgerdi.
Bul týraly jýrnalısterge arnap ótkizilgen brıfıngte Ortalyq saılaý komıssııasynyń múshesi Marat Sársembaev málim etti.
M.Sársembaev usynǵan derekterge sáıkes, saılaýshylardyń belsendiligi jaǵynan Almaty oblysynan keıin, turǵyndarynyń 72,9 paıyzy daýys bergen Qostanaı oblysy jáne 71,8 paıyz kórsetkishpen Qyzylorda oblysy tur. Saǵat 14.00-degi jaǵdaı boıynsha, sonymen qatar, elorda turǵyndarynyń 21,3 paıyzy, Almaty turǵyndarynyń - 14,1, Aqmola oblysy turǵyndarynyń - 69,2, Aqtóbe oblysy saılaýshylarynyń - 47,1, Atyraý turǵyndarynyń - 67,5, Shyǵys Qazaqstan oblysy saılaýshylarynyń - 65,6, Jambyl oblysynyń - 58,1, Batys Qazaqstan oblysy turǵyndarynyń - 55,8, Qaraǵandy oblysy turǵyndarynyń - 51,2, mańǵystaýlyqtardyń - 54,7, Pavlodar oblysy azamattarynyń - 60,6, Soltústik Qazaqstan oblysy azamattarynyń - 59,7 jáne Ońtústik Qazaqstan saılaýshylarynyń 56,8 paıyzy ózderi qalaǵan azamattar men partııaǵa daýys berdi.
Osylaısha, saǵat 14.00-ge deıin respýblıka boıynsha barlyǵy 5 mıllıon 162 myń 922 adam daýys berdi. «Bul el halqynyń 55,5 paıyzy»,-dedi OSK múshesi.
