Saılaýshylardyń amanatyn oryndaýǵa bar kúsh-jigerimdi salamyn - Erlan Qoshanov

ASTANA. QazAqparat – Búgin QR Parlamenti Májilisiniń jalpy otyrysynda palata tóraǵasy Erlan Qoshanov saılaýshylardyń amanatyn oryndaýǵa bar kúsh-jigerin salatynyn aıtty, dep habarlaıdy QazAqparat tilshisi.

Depýtattar aldynda sóz sóılegen E.Qoshanov Májilis tóraǵasy retinde kandıdatýrasyn qoldap, senim kórsetken depýtattarǵa alǵys aıtty.

«Bul senim men úshin úlken mártebe, sondaı-aq halqymyzdyń aldynda zor jaýapkershilik. Sondyqtan palata depýtattarymen birge saılaýshylardyń amanatyn, Memleket basshysynyń reformalaryn júzege asyrý úshin tájirıbemdi, bar kúsh-jigerimdi salamyn dep ýáde beremin», - dedi Májilis tóraǵasy.

Osy oraıda ol búgin VIII saılanǵan QR Parlamentiniń birinshi sessııasy ashylǵanyn, Memleket basshysy Qasym-Jomart Toqaev negizgi jumystardyń baǵdaryn aıqyndap bergenin eske saldy.

«Bul turǵyda júktelgen mindetterdi sapaly ári tez arada iske asyrý bizdiń ortaq jumysymyz. Ol úshin barlyq múmkindik bar. Eń bastysy, bizge halyqtyń senimi bar. Atap aıtqanda, halyqtyń senimin barlyǵymyz abyroımen atqaraıyq», - dedi Erlan Qoshanov.

Budan buryn habarlanǵandaı, búgin QR Parlamenti Májilistiń tóraǵasy laýazymyna Erlan Qoshanov saılandy.