Saılaýshylardy partııalyq tizimdegi ártister men sportshylar emes, saılaýaldy baǵdarlamalar qyzyqtyrady - N. Erimbetov
ASTANA. QazAqparat - QR Saılaýdy baqylaý jónindegi respýblıkalyq qoǵamdyq komıssııa tóraǵasy Nurlan Erimbetovtiń paıymynsha, saılaýshylardy partııalyq tizimde kandıdattyqqa usynylǵan tanymal ártister nemese sportshylar emes, partııalardyń saılaýaldy baǵdarlamasy qyzyqtyrady.
«Meniń kezdesýlerimde, pikir almasýlarda bul taqyryp qozǵalǵan joq. ıAǵnı, qarapaıym adamdardy tizimdegi ánshi nemese sportshynyń tanymaldyǵy asa tolǵandyrmaıdy. Olar úshin partııanyń baǵdarlamasy mańyzdy. Kandıdattar tanymal bolǵandyqtan emes, ózderin qalyptastyryp, eńbek etkenderi úshin iriktelindi. Atap aıtqanda, tamyr-tanystyqpen álem chempıony, iri baıqaýdyń laýreaty ataný múmkin emes. Olar osy jolda ózderiniń kúsh-jigerimen ótip, belesterdi baǵyndyrdy. Men úshin bul adamdardyń óz salasyndaǵy máseleni egjeı-tegjeıli bilýi óte mańyzdy»,-dedi N. Erimbetov baspasóz máslıhatynda.
Shara barysynda komıssııa músheleriniń oblys jáne aýdan ortalyqtaryna, shalǵaıdaǵy aýyldarǵa baryp, sapar barysynda jergilikti partııalyq uıymdardyń jetekshilerimen, kandıdattarmen, saılaýshylarmen kezdesýler ótkendigi habarlandy.
N. Erimbetovtyń sózinshe, búginde saılaýshylar aldaǵy saılaýǵa qatysýǵa belsendi nıet tanytýda. Osy oraıda daýys berýge qatysý óte joǵary deńgeıde bolady dep kútilýde.
